കുസാറ്റ് ഗവേഷക  അന്താരാഷ്ട്ര ശില്പശാലയിൽ

കൊച്ചി: കൊച്ചി ശാസ്ത്ര സാങ്കേതിക സർവകലാശാല (കുസാറ്റ്) സ്കൂൾ ഒഫ് എൻവയോൺമെന്റൽ സ്റ്റഡീസിലെ ഗവേഷക ഡോ. റിയ കെ. അലക്‌സിനെ ബ്രസീലിൽ നടക്കുന്ന സാവോ പോളോ സ്‌കൂൾ ഒഫ് അഡ്വാൻസ്ഡ് സയൻസസ് ഓൺ മൈക്രോപ്ലാസ്റ്റിക്‌സ് അന്താരാഷ്ട്ര ശില്പശാലയിൽ പൂർണ ധനസഹായതോടുകൂടി പങ്കെടുക്കാൻ തിരഞ്ഞെടുത്തു. സെപ്തംബർ 11 വരെ ബ്രസീലിലെ സാവോപോളോ സംസ്ഥാനത്തെ കാംപിനാസിലാണ് ശില്പശാല. യൂണിവേഴ്‌സിറ്റി ഒഫ് കാംപിനാസ്, സാവോ പോളോ റിസർച്ച് ഫൗണ്ടേഷന്റെ പിന്തുണയോടെയാണ് പരിപാടി. പരിസ്ഥിതി പഠന സ്‌കൂളിലെ പ്രൊഫ. ഡോ. സുജ പി. ദേവിപ്രിയയുടെ മാർഗനിർദ്ദേശത്തിൽ കുസാറ്റിൽ നടത്തുന്ന ഗവേഷണത്തിന്റെ തുടർച്ചയായാണ് ശില്പശാലയിലെ ഡോ. റിയയുടെ പങ്കാളിത്തം.