കായലിൽ സ്കൂബ ടീം പരിശോധന

കൊല്ലം: മൺറോത്തുരുത്ത് പഞ്ചായത്ത് പേഴുംതുരുത്ത് ഇടച്ചാൽ പാലത്തിന് സമീപം കായൽത്തീരത്ത് മനുഷ്യന്റെ തലയോട്ടി കണ്ടെത്തിയ സംഭവത്തിൽ പൊലീസ് സ്കൂബ ടീമിന്റെ സഹായത്തോടെ പരിശോധന നടത്തി. കിഴക്കേകല്ലട എസ്.ഐ അനന്തു മോഹന്റെ നേതൃത്വത്തിൽ ശാസ്താംകോട്ട അഗ്നിരക്ഷാസേനയുടെ സ്കൂബ ടീം രണ്ട് മണിക്കൂറോളം കായലിൽ തെരച്ചിൽ നടത്തിയെങ്കിലും കൂടുതൽ അസ്ഥിഭാഗങ്ങളോ അന്വേഷണത്തിന് സഹായകമായ തെളിവുകളോ കണ്ടെത്താനായില്ല. ഈ മാസം 12നാണ് കായൽത്തീരത്ത് തലയോട്ടിയുടെ ഭാഗം കണ്ടെത്തിയത്. തലയോട്ടി ഫോറൻസിക് പരിശോധനയ്ക്കായി അയച്ചിട്ടുണ്ടെന്നും റിപ്പോർട്ട് ലഭിച്ച ശേഷമേ സംഭവത്തിൽ കൂടുതൽ വ്യക്തത ലഭിക്കുകയുള്ളൂവെന്നും പൊലീസ് പറഞ്ഞു.