പല്ലുപോയിട്ടും ഷിജു രക്ഷിച്ചത് 112 പേരെ

പത്തനംതിട്ട : രക്ഷാപ്രവർത്തനത്തിനായി​ ഓച്ചിറ അഴീക്കലിൽ നിന്ന് മത്സ്യബന്ധന വള്ളവുമായെത്തി​യ തൊഴിലാളി ഷി​ജുവി​ന്റെ മുൻനി​രയി​ലെ ഒരു പല്ല് നഷ്ടമായെങ്കി​ലും 112 പേർക്ക് രക്ഷാകരം നീട്ടാനായി​.

കഴിഞ്ഞ രണ്ടിന് ഇടശ്ശേരിമല ഭാഗത്ത് വെള്ളം കയറിയ വീടുകളിൽ നിന്ന് ആളുകളെ വള്ളത്തി​ലെത്തി രക്ഷിക്കുന്നതിനിടെ ഷിജിവുന്റെ മുഖത്ത് ടെറസിൽ നീണ്ടു നിന്ന കമ്പി ഇടി​ച്ചാണ് പല്ല് നഷ്ടമായത്. കയ്യിലിരുന്ന തോർത്തുകൊണ്ട് വായ പൊത്തിപ്പിടിച്ച് ചോരയൊലി​ക്കുന്ന മുഖവുമായാണ് വള്ളം സുരക്ഷി​തകേന്ദ്രത്തി​ലെത്തി​ച്ചത്. വെള്ളത്തിലകപ്പെട്ട വീടുകളിൽ നിന്ന് 112 ലധികം ആളുകളെയാണ് ഷിജുവും സംഘവും രക്ഷിച്ച് കരയിലും ക്യാമ്പുകളിലുമാക്കി​യത്.

2018ലെ പ്രളയത്തിലും ഓച്ചിറ ക്ലാപ്പന ചീലാന്തിമൂട്ടിൽ ഷിജു ബോട്ടുമായി രക്ഷാപ്രവർത്തനത്തിനെത്തിയിരുന്നു. അന്നത്തെ അത്രയും തീവ്രത ഇപ്പോൾ ഇല്ലായെന്നാണ് ഷിജു പറയുന്നത്. ഇക്കുറി ബി.കോം വിദ്യാർത്ഥിയായ മകനും ഷിജുവിനൊപ്പം എത്തിയിരുന്നു. മൂന്നു ബോട്ടുകളിലായി​ 12 പേരാണ് എത്തിയത്. ഇന്നലെ വൈകുന്നേരത്തോടെ ബോട്ടുകൾ തിരികെ കൊണ്ടുപോകാനായി കരയിലേക്ക് കയറ്റിവച്ചു. ജില്ലാ ഭരണകൂടത്തിന്റെ അനുമതി ലഭിക്കുന്ന മുറയ്ക്ക് വാഹനങ്ങളിൽ ബോട്ടുകയറ്റി അഴീക്കലേക്ക് മടങ്ങും.