സി.ബി.എൽ ആറാംസീസൺ: പാണ്ടനാട്ടിലെ മൂന്നാംലീഗ് മത്സരത്തിൽ മേൽപ്പാടം ചുണ്ടന് വിജയം

പാണ്ടനാട് : സംസ്ഥാന ടൂറിസം വകുപ്പ് സംഘടിപ്പിക്കുന്ന ചുണ്ടൻ വള്ളങ്ങളുടെ ഐ.പി.എൽ മാതൃകയിലുള്ള ചാമ്പ്യൻസ് ബോട്ട് ലീഗ് (സി.ബി.എൽ.) ആറാം സീസണിലെ മൂന്നാം ലീഗ് മത്സരത്തിൽ പള്ളാത്തുരുത്തി ബോട്ട് ക്ലബ് തുഴഞ്ഞ മേൽപ്പാടം ചുണ്ടൻ ജേതാക്കളായി. പാണ്ടനാട് മിത്രമഠം നെട്ടായത്തിൽ നടന്ന ആവേശകരമായ മത്സരത്തിൽ അരോമ ബോട്ട് ക്ലബ് തുഴഞ്ഞ അരോമ ചുണ്ടനെയും നിരണം ബോട്ട് ക്ലബ് തുഴഞ്ഞ നിരണം ചുണ്ടനെയും മറികടന്നാണ് മേൽപ്പാടം ഒന്നാമതെത്തിയത്.

ആഭ്യന്തരമന്ത്രി രമേശ് ചെന്നിത്തല മത്സരം ഉദ്ഘാടനം ചെയ്തു

മന്ത്രി പി.സി. വിഷ്ണുനാഥ് വിജയികൾക്ക് സമ്മാനം വിതരണം ചെയ്തു. . സജി ചെറിയാൻ എം.എൽ.എ വള്ളംകളിയുടെ മാസ് ഡ്രിൽ ഫ്ലാഗ് ഓഫ് ചെയ്തു.

പാണ്ടനാട് ഗ്രാമപഞ്ചായത്ത് പ്രസിഡന്റ് ജിജി കുഞ്ഞുകുഞ്ഞ്, ജില്ലാ പഞ്ചായത്ത് പ്രസിഡന്റ് എ. മഹേന്ദ്രൻ, മുൻ എം.എൽ.എമാരായ മാമ്മൻ ഐപ്പ്, ശോഭന ജോർജ്, ചെങ്ങന്നൂർ ബ്ലോക്ക് പഞ്ചായത്ത് പ്രസിഡന്റ് എൻ. സുധാമണി, ചെങ്ങന്നൂർ നഗരസഭ ചെയർമാൻ മനീഷ് കീഴാമഠത്തിൽ, വെണ്മണി ഗ്രാമപഞ്ചായത്ത് പ്രസിഡന്റ് ജെബിൻ പി. വർഗീസ് തുടങ്ങിയവർ പങ്കെടുത്തു.

ഫൈനൽ ഉൾപ്പെടെ ആകെ 11 മത്സരങ്ങളാണ് ഈ സീസണിലുള്ളത്. തൃശ്ശൂർ കോട്ടപ്പുറം (ഒക്ടോബർ 4), എറണാകുളം മറൈൻ ഡ്രൈവ് (ഒക്ടോബർ 10), പിറവം (ഒക്ടോബർ 17), കോട്ടയം താഴത്തങ്ങാടി (ഒക്ടോബർ 24), ആലപ്പുഴ പുളിങ്കുന്ന് (ഒക്ടോബർ 31), കൈനകരി (നവംബർ 7), കായംകുളം (നവംബർ 14) എന്നിവിടങ്ങളിലാണ് ഇനി ലീഗ് മത്സരങ്ങൾ നടക്കുക. നവംബർ 21ന് കൊല്ലത്ത് നടക്കുന്ന പ്രസിഡന്റ്സ് ട്രോഫി വള്ളംകളിയോടെ സി.ബി.എൽ. ആറാം സീസണിന് സമാപനമാകും.