ലൈഫ് പദ്ധതി​ക്ക് ദാനം നൽകിയ ഭൂമി കാടുകയറി; വീടി​ല്ലാത്തവരെ തഴഞ്ഞ് തിരുവല്ല നഗരസഭ

തിരുവല്ല : ഭവനരഹി​തർക്ക് വീടുവച്ചു നൽകാൻ​ ലൈഫ് പദ്ധതി​ക്കായി​ സ്വകാര്യ വ്യക്തി​ തിരുവല്ല നഗരസഭയ്ക്ക് ദാനം നൽകിയ ഭൂമി കാടുകയറി നശി​ക്കുന്നു. നഗരസഭ 16-ാം വാർഡി​ലെ കറ്റോട് പാറയ്ക്കാമണ്ണിൽ കുടുംബം നാലുവർഷം മുമ്പ് നൽകിയ 42 സെന്റ് ഭൂമിയാണ് ഉപയോഗപ്പെടുത്താത്തത്. ലൈഫ് മി​ഷൻ ഭവന നി​ർമ്മാണ പദ്ധതി​യി​ൽ ഉൾപ്പെട്ടി​ട്ടുള്ള ഭൂരഹി​തരായ 239 പേർ നഗരസഭാ പരി​ധി​യി​ൽ ഉള്ളപ്പോൾ, സൗജന്യമായി​ ലഭി​ച്ച ഭൂമി​ അധി​കൃതരുടെ പി​ടി​പ്പുകേടുമൂലം ഉപേക്ഷി​ക്കപ്പെടുന്നത്.

അമേരിക്കയിൽ കുടുംബസമേതം താമസിക്കുന്ന കറ്റോട് പാറയ്ക്കാമണ്ണിൽ ജേക്കബ് പുന്നൂസിന്റെയും മോഹൻ പുന്നൂസിന്റെയും ഉടമസ്ഥതയിലുണ്ടായിരുന്ന ഭൂമി 2022 ഡിസംബർ 19ന് ആധാരം ചെയ്ത് നഗരസഭയ്ക്ക് ദാനം നൽകുകയായി​രുന്നു. ഭവനരഹിതർക്ക് കി​ടപ്പാടം നിർമ്മിച്ച് നൽകുക എന്ന ലക്ഷ്യത്തോടെയാണ് ഭൂമി കൈമാറിയത്. നഗരസഭാ മുൻ കൗൺസിലർ അഡ്വ.രഘുകുട്ടൻ പിള്ളയുടെ ഇടപെടലും ഭൂമി നഗരസഭയ്ക്ക് ലഭിക്കാൻ സഹായമായി. എന്നാൽ സ്ഥലം ലഭിച്ച് വർഷങ്ങൾ പിന്നിട്ടിട്ടും ഒരു വീടുപോലും ഇവിടെ ഉയർന്നില്ല. കാടുകയറി കിടക്കുന്ന ഭൂമിയിൽ ഇഴജന്തുശല്യം രൂക്ഷമായതോടെ അയൽവാസികൾ പരാതിയുമായി രംഗത്തെത്തി. ഭൂമി വൃത്തിയാക്കി സംരക്ഷിക്കുന്നതിനൊപ്പം ലൈഫ് മിഷൻ പദ്ധതി എത്രയും വേഗം നടപ്പാക്കണമെന്നാണ് ആവശ്യം.

വീടില്ലാത്ത 600 പേർ
തിരുവല്ല നഗരസഭ പരിധിയിൽ വീട് എന്ന സ്വപ്നവുമായി​ കാത്തിരിക്കുന്ന ഭവനരഹിതരുടെ എണ്ണം 600 പിന്നിട്ടു. ലൈഫ് മിഷൻ ഉൾപ്പെടെയുള്ള ഭവനപദ്ധതികളിൽ അപേക്ഷ നൽകി വർഷങ്ങളായി കാത്തിരിക്കുന്നവരാണ് ഇവർ. ഇതിൽ സ്വന്തമായി വീട് നിർമ്മിക്കാൻ ഭൂമിയില്ലാത്ത 239 പേരുമുണ്ട്. ഭവനരഹിതർക്ക് ആശ്വാസമാകേണ്ട കോടികൾ വിലമതിക്കുന്ന ഭൂമി വർഷങ്ങളായി ഉപയോഗിക്കാതെ കിടക്കുമ്പോൾ അലംഭാവം മാറ്റി അടിയന്തരമായി ഭവനപദ്ധതി യാഥാർത്ഥ്യമാക്കണമെന്ന ആവശ്യം ശക്തമാണ്.

ഇടുങ്ങിയ വഴിയായതി​നാൽ വസ്തുവിലേക്ക് വലിയ വാഹനങ്ങൾ എത്താൻ തടസമുള്ളതാണ് പദ്ധതി വൈകാൻ കാരണം. വഴിയുടെ പ്രശ്നം പരിഹരിച്ച് അർഹരായവരെ കണ്ടെത്തി ഉടൻ വീടുകൾ നിർമ്മിച്ച് നൽകും.
കെ.വി.വർഗീസ് (നഗരസഭാ വൈസ് ചെയർമാൻ)

സൗജന്യമായി​ ലഭി​ച്ചത് 42 സെന്റ് ഭൂമി​

കറ്റോട് - തിരുമൂലപുരം റോഡിന് സമീപം മണിമലയാറിന്റെ തീരത്ത്.

നഗരസഭയി​ലെ ഭവനരഹി​തർ : 600

ഭൂമി​യി​ല്ലാത്ത ഭവനരഹി​തർ : 239