പെൺസുഹൃത്തിന് ക്രൂരമർദ്ദനം തോക്ക് ഷാജി അറസ്റ്റിൽ

കാട്ടാക്കട: ഒപ്പം കഴിഞ്ഞിരുന്ന പെൺസുഹൃത്തിനെ ക്രൂരമായി മർദ്ദിച്ച് ഗുരുതരമായി പരിക്കേൽപ്പിച്ച കാപ്പാ കേസ് പ്രതി അറസ്റ്റിൽ.'തോക്ക് ഷാജി' എന്നറിയപ്പെടുന്ന മൈലക്കര സ്വർണക്കോട് ഷാജിഭവനിൽ ഷാജിയാണ് (41) അറസ്റ്റിലായത്.കള്ളിക്കാട് മൈലക്കര സ്വദേശി നിഷ.ആർ.മോഹനെയാണ് (42) ഷാജി മദ്യലഹരിയിൽ ക്രൂരമായി മർദ്ദിച്ചത്.കഴിഞ്ഞ രണ്ട് മാസമായി കാട്ടാക്കടയ്ക്ക് സമീപം ഇടവച്ചാലിൽ ഒരു വീട്ടിൽ ഷാജിയും നിഷയും ഭാര്യാഭർത്താക്കന്മാരെ പോലെ കഴിയുകയായിരുന്നു.തിങ്കളാഴ്ച പുലർച്ചെ 4 ഓടെയായിരുന്നു ആക്രമണം.വീട്ടിലെ സിറ്റൗട്ടിൽ ഇരിക്കുകയായിരുന്ന നിഷയെ ഷാജി ചുവരിനോട് ചേർത്തുനിർത്തി മർദ്ദിക്കുകയും,തല സിറ്റൗട്ടിൽ ഇടിപ്പിക്കുകയുമായിരുന്നു.ആക്രമണത്തിൽ നിഷയുടെ തലയുടെ പിൻഭാഗത്ത് പൊട്ടലും ആഴത്തിലുള്ള മുറിവും സംഭവിച്ചു.ഗുരുതരമായി പരിക്കേറ്റ നിഷയെ ആദ്യം കാട്ടാക്കടയിലെ സ്വകാര്യ ആശുപത്രിയിലും പിന്നീട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.നിഷ ചികിത്സയിൽ തുടരുകയാണ്.ഷാജിയുടെ മദ്യപാനം നിഷ വിലക്കിയതിലുള്ള വിരോധമാണ് ആക്രമണത്തിൽ കലാശിച്ചതെന്ന് പൊലീസ് പറയുന്നു.കാട്ടാക്കട ഡിവൈ.എസ്.പി ബിനുവിന്റെയും ആര്യനാട് സി.ഐ സജിൻ ലൂയിസിന്റെയും നേതൃത്വത്തിൽ നെയ്യാർഡാം എസ്.ഐ ഷിജു.എസ്.എസ്,സി.പി.ഒമാരായ രാജേഷ്,അരുൺ,ഷംനാദ്,ബിനു,ദീപു എന്നിവർ ചേർന്നാണ് പ്രതിയെ പിടികൂടിയത്.ഇയാളെ കോടതിയിൽ ഹാജരാക്കി.