എൽ.ഐ.സി ഏജന്റുമാരുടെ കമ്മിഷൻ കുറയ്ക്കരുത്

ഇൻഷ്വറൻസ് വ്യാപനത്തെ ബാധിക്കുമെന്ന് ഏജന്റ്സ് ഫെഡറേഷൻ

കൊച്ചി: എൽ.ഐ.സി ഏജന്റുമാരുടെ കമ്മിഷൻ വീണ്ടും കുറയ്ക്കാനുള്ള നീക്കം ഇൻഷ്വറൻസ് വ്യാപനത്തെ പ്രതികൂലമായി ബാധിക്കുമെന്ന് എൽ.ഐ.സി ഏജന്റ്സ് ഫെഡറേഷൻ ദേശീയ സെക്രട്ടറി ജനറൽ തോന്നയ്ക്കൽ രാമചന്ദ്രൻ പറഞ്ഞു. 2023ൽ പോളിസികൾ പരിഷ്കരിച്ചപ്പോൾ ഫസ്റ്റ് ഇയർ കമ്മിഷനിൽ ഏഴ് ശതമാനം കുറവു വരുത്തിയെന്നും ഏജന്റുമാർക്ക് ഇപ്പോഴും കുറഞ്ഞ കമ്മിഷനാണ് ലഭിക്കുന്നതെന്നും അദ്ദേഹം പറഞ്ഞു.

എൽ.ഐ.സിയുടെ പ്രധാന പോളിസികളിൽ 15 ശതമാനത്തിൽ താഴെയാണ് കമ്മിഷനെന്നും പോളിസി കാലാവധി പൂർത്തിയാകുമ്പോൾ ഏജന്റിന് ലഭിക്കുന്ന ശരാശരി കമ്മിഷൻ 7.5 ശതമാനം മാത്രമാണെന്നും അദ്ദേഹം ചൂണ്ടിക്കാട്ടി. പല ഏജന്റുമാരും ഉപഭോക്താക്കളിൽനിന്ന് പ്രീമിയം ശേഖരിച്ച് അടയ്ക്കുന്ന ജോലിയും നിർവഹിക്കുന്നുണ്ട്. കുറഞ്ഞ കമ്മിഷൻ അവരുടെ ഉപജീവനത്തെ ബാധിക്കുകയാണ്.

1956ൽ അഞ്ച് കോടി രൂപയുടെ പ്രവർത്തനമൂലധനവുമായി ആരംഭിച്ച എൽ.ഐ.സി. ഇന്ന് 59 ലക്ഷം കോടി രൂപയുടെ ആസ്തിയുള്ള സ്ഥാപനമായി വളർന്നതിൽ ഏജന്റുമാരുടെ പങ്ക് നിർണായകമാണെങ്കിലും അതിനനുസൃതമായ ആനുകൂല്യങ്ങൾ ലഭിക്കുന്നില്ലെന്നും അദ്ദേഹം ആരോപിച്ചു. ഇൻഷ്വറൻസ് വ്യാപനം ശക്തമാക്കുന്നതിന് ഏജന്റുമാരുടെ കമ്മിഷൻ കുറയ്ക്കുന്നതിനു പകരം അവരുടെ വരുമാനവും സാമൂഹിക സുരക്ഷിതത്വവും ഉറപ്പാക്കുകയാണ് വേണ്ടതെന്ന് അദ്ദേഹം നിർദേശിച്ചു.