പാകിസ്ഥാനി പാസ്‌പോർട്ടിൽ വലിയ മാറ്റം വരുന്നു; ഒക്‌ടോബർ 15ന് പുതിയ തുടക്കം

ദുബായ് : ഒക്‌ടോബർ 16 മുതൽ മെഷീൻ റീഡബിൾ പാസ്‌പോർട്ട് (എംആർപി) ഇഷ്യു ചെയ്യുന്നത് അവസാനിപ്പിക്കുകയാണെന്ന് പാകിസ്ഥാൻ. ഇനി മുതൽ ഇ-പാസ്‌പോർട്ടുകളായിരിക്കും ആഭ്യന്തര - അന്താരാഷ്ട്ര യാത്രക്കാർക്കായി നൽകുക. എന്നാൽ നിലവിൽ എംആർപി ഉപയോഗിക്കുന്നവർ ഒക്‌ടോബർ 15ന് മുൻപ് മാറ്റി വാങ്ങേണ്ടതുണ്ടോ, നിലവിലെ പാസ്‌പോർട്ടിന്റെ കാലാവധി തീരുമ്പോൾ എന്താണ് സംഭവിക്കുക എന്നിങ്ങനെയുള്ള കാര്യങ്ങൾ അറിഞ്ഞിരിക്കാം.

ഒക്‌ടോബർ 15 മുതൽ പുതിയ പാകിസ്ഥാനി പാസ്‌പോർട്ടിനായി അപേക്ഷിക്കുന്നവർക്ക് ഇ-പാസ്‌‌പോർട്ടായിരിക്കും ലഭിക്കുക. ഈ മാറ്റം പാകിസ്ഥാനിലെ പാസ്‌പോർട്ട് ഓഫീസുകൾക്കും വിദേശ കോൺസുലേറ്റുകൾക്കും ബാധകമായിരിക്കും.

എന്നാൽ നിലവിലെ പാസ്‌പോർട്ട് ഒക്‌ടോബർ 15 മുതൽ അസാധുവാകില്ല. കാലാവധി രേഖപ്പെടുത്തിയിരിക്കുന്ന ദിവസം വരെ ഈ പാസ്‌പോർട്ട് സാധുവായിരിക്കും. മാത്രമല്ല, സന്ദർശിക്കുന്ന രാജ്യത്തെ പാസ്‌പോർട്ട് കാലാവധിയുമായും കുടിയേറ്റ നടപടിക്രമങ്ങളുമായും ബന്ധപ്പെട്ട സാധാരണ വ്യവസ്ഥകൾ യാത്രക്കാർ തുടർന്നും പാലിക്കേണ്ടതുണ്ട്.

എംആർപിയുടെ കാലാവധി കഴിഞ്ഞാൽ പുതിയതായി ഇ-പാസ്‌പോർട്ട് ആയിരിക്കും ലഭിക്കുക. പാസ്‌പോർട്ട്, തിരിച്ചറിയൽ വിവരങ്ങൾ എന്നിവ സൂക്ഷിക്കുന്ന ചിപ്പ് അടങ്ങിയ ഇലക്ട്രോണിക് പാസ്‌പോർട്ടാണ് ഇ-പാസ്‌പോർട്ട്. ഇമിഗ്രേഷൻ സംവിധാനങ്ങൾ ഉപയോഗിച്ച് ഇതിലെ ഇലക്ട്രോണിക് ഭാഗം വായിക്കാനും അതുവഴി തിരിച്ചറിയൽ വിവരങ്ങളും പാസ്‌പോർട്ട് വിവരങ്ങളും ഇലക്ട്രോണിക് രീതിയിൽ പരിശോധിക്കാനും സാധിക്കും. പാകിസ്ഥാൻ ഇതിനകം തന്നെ ഇ-പാസ്‌പോർട്ടുകൾ അവതരിപ്പിച്ചു തുടങ്ങിയിട്ടുണ്ട്. രാജ്യത്തെ പാസ്‌പോർട്ട് സംവിധാനം ആധുനീകരിക്കാനും അന്താരാഷ്ട്ര യാത്രകൾ സുഗമമാക്കാനും ലക്ഷ്യമിട്ടാണ് പുതിയ നീക്കമെന്ന് അധികൃതർ അറിയിച്ചു.