പാചകത്തിനുപയോഗിക്കുന്ന കത്തിയിലും പാത്രങ്ങളിലും തുരുമ്പോ പൊട്ടലോ കണ്ടാൽ നടപടി, പുതിയ നിർദേശം

ന്യൂഡൽഹി: ഫുഡ് ഗ്രേഡുള്ളതും തുരുമ്പെടുക്കാത്തതുമായ കത്തി,​ ബ്ളേഡ്,​ മുറിക്കാനുള്ള ഉപകരണങ്ങൾ എന്നിവ മാത്രമേ ഉപയോഗിക്കാൻ പാടുള്ളൂവെന്ന് ഭക്ഷ്യ വ്യാപാരികൾക്ക് നിർദേശം. ഫുഡ് സേഫ്‌ടി ആന്റ് സ്റ്റാൻഡേർഡ്‌സ് അതോറിറ്റി ഓഫ് ഇന്ത്യ (എഫ്എസ്‌എസ്എഐ)​ ആണ് നി‌ർദേശം നൽകിയത്.

തുരുമ്പെടുത്തതും നശിച്ചതുമായ ഉപകരണങ്ങൾ ചില ഭക്ഷ്യശാലകളിൽ ഉപയോഗിക്കുന്നത് ശ്രദ്ധയിൽപ്പെട്ടുവെന്നും മാർഗനിർദേശത്തിൽ പറയുന്നു. ഇത്തരം ഉപകരണങ്ങളുടെ ഉപയോഗം ഭക്ഷ്യവസ്തുക്കളുടെ മലിനീകരണത്തിന് കാരണമാകുമെന്നും ഇത് ആരോഗ്യപ്രശ്നങ്ങൾക്കിടയാക്കുമെന്നും എഫ്എസ്‌എസ്എഐ ചൂണ്ടിക്കാട്ടുന്നു.

ഉപകരണങ്ങൾക്ക് പുറമെ പാത്രങ്ങൾ,​ ആഹാരം തയ്യാറാക്കുന്നതിനും പാക്കിംഗിനും സ്റ്റോറേജിനുമായി ഉപയോഗിക്കുന്ന പ്രതലങ്ങൾ എന്നിവ ഫുഡ് ഗ്രേഡുള്ളതും വിഷരഹിതമായതും തുരുമ്പെടുക്കാത്തതുമായ വസ്തുക്കൾ കൊണ്ട് നിർമിച്ചതുമായിരിക്കണം. മാത്രമല്ല ഇവയെല്ലാം വൃത്തിയായി സൂക്ഷിക്കുകയും വേണം. മാത്രമല്ല,​ വിള്ളൽ വീണതും പൊട്ടിയതുമായ കത്തികളും ഉപകരണങ്ങളും പാത്രങ്ങളും ഒഴിവാക്കണമെന്ന് നിർദേശമുണ്ട്.

ഇടവിട്ടുള്ള സമയങ്ങളിൽ പാചക ഉപകരണങ്ങൾ വ‌ൃത്തിയാക്കുകയും അണുവിമുക്തമാക്കുകയും വേണം. നി‌‌ർദേശങ്ങൾ ലംഘിക്കുന്നവർക്കെതിരെ നടപടി സ്വീകരിക്കുമെന്നും മുന്നറിയിപ്പുണ്ട്.