ബംഗ്ലാവ് കഴുകാൻ ഫയർഫോഴ്സ്  എം.എൽ.എയ്ക്ക് 2700 രൂപ പിഴ

അഹമ്മദാബാദ്: ബി.ജെ.പി എം.എൽ.എയുടെ ആഡംബര ബംഗ്ലാവ് കഴുകാൻ ഫയർഫോഴ്സ് വാഹനം. ഗുജറാത്തിലെ ധൻപൂർ മണ്ഡലത്തിലെ ബി.ജെ.പി എം.എൽ.എ ബച്ചുഭായ് ഖബാദിന്റെ വസതിയും പരിസരവും കഴുകാനാണ് ഫയർഫോഴ്സിനെ എത്തിച്ചത്. വൃത്തിയാക്കുന്നതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായതോടെ വൻ വിവാദമായി.

പിന്നാലെ ഖബാദിന്റെ മകൻ ബൽവന്ത് ഖബാദിൽ നിന്ന് 2,700 രൂപ പിഴ ഈടാക്കിയതായി അധികൃതർ അറിയിച്ചു. എം.എൽ.എ വിളിച്ചപ്പോൾ അടിയന്തര സാഹചര്യമുണ്ടെന്ന് കരുതിയാണ് ഫയർ ഫോഴ്സിനെ അറിയിച്ചതെന്നും തുടർ നിയമനടപടികൾ സ്വീകരിക്കുന്നത് പരിഗണനയിലാണെന്നുമാണ് മുനിസിപ്പാലിറ്റി ചീഫ് ഓഫീസറുടെ ന്യായീകരണം.