കേന്ദ്രമന്ത്രിസ്ഥാനം രാജിവച്ച് എൽ.മുരുകൻ, ലക്ഷ്യം തമിഴ്നാട്ടിൽ പാർട്ടിയെ ശക്തിപ്പെടുത്തൽ

ന്യൂഡൽഹി: തമിഴ്നാട്ടിൽ നിന്നുള്ള ബി.ജെ.പി ദളിത് നേതാവും കേന്ദ്ര സഹമന്ത്രിയുമായ എൽ. മുരുകൻ കേന്ദ്രമന്ത്രി പദവും രാജ്യസഭാംഗത്വവും രാജിവച്ചു. 2029ലെ ലോക്‌സഭാ തിരഞ്ഞെടുപ്പിന് മുമ്പ് തമിഴ്‌നാട്ടിൽ പാർട്ടിയെ ശക്തിപ്പെടുത്താൻ ആഗ്രഹിക്കുന്നുവെന്ന് പ്രധാനമന്ത്രിക്ക് അയച്ച രാജിക്കത്തിൽ വ്യക്തമാക്കി. വാർത്താ വിതരണ,​ പ്രക്ഷേപണ, പാർലമെന്ററി കാര്യ സഹമന്ത്രിയായിരുന്ന അദ്ദേഹത്തിന് 2030 വരെയാണ് കാലാവധിയുണ്ടായിരുന്നത്. കേന്ദ്രമന്ത്രിസഭാ പുനഃസംഘടന ഉടൻ നടക്കാനിരിക്കെയാണ് നീക്കം. പ്രധാനമന്ത്രി നരേന്ദ്രമോദിയുടെ കീഴിൽ സേവനമനുഷ്ഠിക്കുന്നത് ഏറ്റവും വലിയ ബഹുമതിയാണെന്ന് മുരുകൻ എക്സിൽ കുറിച്ചു.

2021 മുതൽ കേന്ദ്രമന്ത്രി

 തമിഴ്നാട് നാമക്കൽ സ്വദേശി. അഭിഭാഷകൻ

 2017- 2020ൽ ദേശീയ പട്ടികജാതി കമ്മിഷൻ വൈസ് ചെയർമാൻ

 2021മുതൽ കേന്ദ്രമന്ത്രി

 തമിഴ്നാട് ബി.ജെ.പി അദ്ധ്യക്ഷനായി പ്രവർത്തിച്ചു

 കേരളത്തിലെ ബി.ജെ.പിയുടെ ചുമതലയും വഹിച്ചു

 2024 മുതൽ മദ്ധ്യപ്രദേശിൽ നിന്നുള്ള രാജ്യസഭാംഗം