റബർ ടാപ്പിംഗിനെത്തിയ സ്ത്രീയെ അഞ്ച് മീറ്റർ നീളമുള്ള പെരുമ്പാമ്പ് വിഴുങ്ങി; വയർ പിളർന്ന ഗ്രാമവാസികൾ കണ്ടത്

നടക്കുന്ന വഴിയിൽ എന്തെങ്കിലും ചുരുണ്ടുകൂടിക്കിടക്കുന്നത് കണ്ടാൽ തന്നെ നമുക്ക് ഉള്ളൊന്ന് കാളും. പാമ്പുകളോടുള്ള നമ്മുടെ ഭയമാണ് ഇതിന് പ്രധാന കാരണം. കടിയേറ്റാൽ ജീവൻ തന്നെ അപകടത്തിലാകുമെന്നറിയാവുന്നത് കൊണ്ട് എല്ലാവരും പാമ്പുകളിൽ നിന്ന് അകലം പാലിക്കാറുമുണ്ട്. എന്നാൽ വിഷപ്പാമ്പുകളെ നമ്മൾ പേടിക്കുമ്പോൾ, ഇന്തോനേഷ്യയിലെ ജനങ്ങൾ ഏറ്റവും കൂടുതൽ ഭയക്കുന്നത് വിഷമില്ലാത്ത പെരുമ്പാമ്പുകളെയാണ്. അടുത്തിടെയായി അവിടെ പെരുമ്പാമ്പ് മനുഷ്യരെ വിഴുങ്ങുന്ന സംഭവങ്ങൾ വർദ്ധിച്ചതാണ് ഇതിന് പ്രധാന കാരണം.

2022 ഒക്ടോബറിലായിരുന്നു അഞ്ച് മീറ്റർ നീളമുള്ള ഒരു പെരുമ്പാമ്പ് ഒരു സ്ത്രീയെ മുഴുവനായി വിഴുങ്ങിയത്. സുമാത്രയിലെ ജാംബി പ്രവിശ്യയിലെ ഒരു സ്ത്രീ റബർ ടാപ്പിംഗിന് പോയെങ്കിലും മടങ്ങിയെത്തിയില്ല. 50 വയസുള്ള ഈ സ്ത്രീയെ തേടി ഭർത്താവ് ഇറങ്ങിയപ്പോഴാണ് ചില വസ്ത്രങ്ങളും ഉപകരണങ്ങളും റബർ തോട്ടത്തിൽ കണ്ടെത്തിയത്. ഇതോടെ തെരച്ചിൽ ആരംഭിച്ച ഗ്രാമവാസികൾ കണ്ടത് ഞെട്ടിക്കുന്ന കാഴ്ചയായിരുന്നു.

റബർ തോട്ടത്തിന് സമീപം വയറ് വീർത്ത ഒരു പെരുമ്പാമ്പിനെയാണ് ഗ്രാമവാസികൾ ആദ്യം കണ്ടെത്തിയത്. ഇത് സ്ത്രീയെ വിഴുങ്ങിയതാണെന്ന് അവർ ഉറപ്പിച്ചിരുന്നു. പാമ്പിന്റെ വയർ പിളർന്നപ്പോഴാണ് സ്ത്രീയുടെ മൃതദേഹം കണ്ടെത്തിയത്. പാമ്പ് ഇരയായി വിഴുങ്ങിയ സ്ത്രീയുടെ മൃതദേഹം അഴുകിത്തുടങ്ങിയില്ലെന്ന് പ്രാദേശിക പൊലീസ് മേധാവി എകെപി എസ് ഹരേഫ അന്ന് സിഎൻഎൻ ഇന്തോനേഷ്യയോട് പറഞ്ഞിരുന്നു.

എന്നാൽ അഞ്ച് മീറ്റർ നീളമുള്ള ഒരു പെരുമ്പാമ്പിനെ ഇങ്ങനെയൊക്കെ ചെയ്യാൻ സാധിക്കുമോ എന്ന ചോദ്യം ഇതോടെ എല്ലാവരിലും ഉയർന്നു. ഇത്തരം കേസുകൾ വളരെ അപൂർവമാണെങ്കിലും സത്യമാണെന്ന് സിംഗപ്പൂർ വന്യജീവി സംരക്ഷണ കേന്ദ്രത്തിലെ മേരിറൂത്ത് ലോ ബിബിസിയോട് പറഞ്ഞു. പശുവിന്റെ വലിപ്പമുള്ള മൃഗങ്ങളെ പെരുമ്പാമ്പുകൾ തിന്നുന്നത് അസാധാരണമല്ലെന്നും അവർ കൂട്ടിച്ചേർത്തു.

ഇത് അസാധ്യമാണെന്ന് തോന്നുമെങ്കിലും പാമ്പുകളുടെ ശരീരഘടനയാണ് ഇതിന് സഹായിക്കുന്നത്. സയൻസ് ഫോക്കസിന്റെ അഭിപ്രായത്തിൽ, ഒരു പെരുമ്പാമ്പ് അതിന്റെ ഇരയെ മുഴുവനായും വിഴുങ്ങും. തലയാണ് ആദ്യം വിഴുങ്ങുക. സ്വന്തം തലയേക്കാൾ വളരെ വീതിയുള്ള മൃഗങ്ങളെ ഇരയായി അകത്തേക്ക് കടത്തുന്ന വിധത്തിലാണ് പെരുമ്പാമ്പുകളുടെ തലയോട്ട് രൂപകൽപന ചെയ്തിരിക്കുന്നത്.

താഴത്തെ താടിയെല്ല് ഒരു നീണ്ട ലിഗമെന്റിനാൽ ബന്ധിപ്പിച്ചിരിക്കുന്ന രണ്ട് വ്യത്യസ്ത ഭാഗങ്ങളാൽ നിർമ്മിച്ചതാണ്. ഇത് പെരുമ്പാമ്പിന്റെ ചർമ്മത്തിന് വലിച്ചെടുക്കാൻ കഴിയുന്നത്ര വീതിയിൽ വായ തുറക്കാൻ സഹായിക്കുന്നു. തല ആദ്യം വിഴുങ്ങുന്നത് ഭക്ഷണം കൂടുതൽ സുഗമമായി താഴേക്ക് പോകാൻ സഹായിക്കുന്നു. ഭക്ഷണം ഉള്ളിൽ ചെന്നാൽ ദഹനത്തിന് സമയമെടുക്കും. ചിലപ്പോൾ ഒരു മാസം വരെ സമയം എടുത്തേക്കാം. പാമ്പിന്റെ വയറ്റിലെ ആസിഡും എൻസൈമുകളും എല്ലുകളും പല്ലുകളും എല്ലാം ഒരുമിച്ച് തകർക്കും.