ജ്യോതി സുരേഖ വെണ്ണം, ചിഖിത തനിപർത്തി, പ്രിതിക പ്രദീപ്
നഗോയ: ഏഷ്യൻ ഗെയിംസ് അമ്പെയ്ത്തിൽ ഇന്ത്യയ്ക്ക് സ്വർണത്തുടക്കം. വനിതകളുടെ കോമ്പൗണ്ട് ടീം ഇനത്തിൽ ജ്യോതി സുരേഖ വെണ്ണം, ചിഖിത തനിപർത്തി, പ്രിതിക പ്രദീപ് എന്നിവരടങ്ങിയ ഇന്ത്യൻ സംഘം സ്വർണം നേടി. ഫൈനലിൽ ചൈനയെ പരാജയപ്പെടുത്തിയാണ് ഇന്ത്യ കിരീടം നിലനിർത്തിയത്. ലോക റെക്കോർഡിനൊപ്പമെത്തുന്ന പ്രകടനമാണ് ഇന്ത്യ കാഴ്ചവച്ചത്. പിന്നാലെ കോമ്പൗണ്ട് മിക്സഡ് ടീമും സ്വർണ മെഡൽ സ്വന്തമാക്കി. ദക്ഷിണ കൊറിയയോട് ഷൂട്ട് ഓഫിലായിരുന്നു ഇന്ത്യയുടെ വിജയം.
ഹാങ്ചൗൽ നടന്ന കഴിഞ്ഞ ഏഷ്യൻ ഗെയിംസിൽ അമ്പെയ്ത്ത് മത്സരത്തിൽ ഇന്ത്യ കൊറിയയുടെ ആധിപത്യം അവസാനിപ്പിച്ചിരുന്നു. നാഗോയയിലും മികച്ച പ്രകടനം ആവർത്തിക്കുമെന്ന പ്രതീക്ഷയോടെയാണ് താരങ്ങൾ മത്സരത്തിനിറങ്ങിയത്.
ഫൈനലിന് മുമ്പ് ദക്ഷിണ കൊറിയയായിരുന്നു ഇന്ത്യയുടെ പ്രധാന വെല്ലുവിളി. ആവേശകരമായ മത്സരത്തിൽ ആദ്യ എൻഡിൽ ഇരു ടീമുകൾക്കും 59 പോയിന്റ് വീതമായിരുന്നു. രണ്ടാം എൻഡിൽ ജ്യോതിയുടെ പരിചയസമ്പത്തും ചിഖിതയുടെയും പ്രിതികയുടെയും മികച്ച പ്രകടനത്തിൽ ഇന്ത്യയ്ക്ക് മുൻതൂക്കം ലഭിച്ചു.
ഇന്ത്യ 59 പോയിന്റ് നേടിയപ്പോൾ കൊറിയയ്ക്ക് 56 പോയിന്റായിരുന്നു. മൂന്നാം എൻഡിൽ ഇന്ത്യ 58 പോയിന്റിലേക്ക് ഒതുങ്ങിയെങ്കിലും രണ്ടാം എൻഡിൽ നേടിയ ലീഡ് നിർണായകമായി. അവസാന എൻഡിൽ കൊറിയയ്ക്കൊപ്പം 58 പോയിന്റ് നേടി ഇന്ത്യ മത്സരം 234-233ന് സ്വന്തമാക്കിയാണ് ഫൈനലിലെത്തിയത്.
ഫൈനലിൽ ചൈനയ്ക്കെതിരെ ഇന്ത്യ തുടക്കം മുതൽ തന്നെ ആധിപത്യം പുലർത്തി. ആദ്യ എൻഡിൽ ഇന്ത്യ 60-58ന് മുന്നിലെത്തി. രണ്ടാം എൻഡിലും 60-58ന് ഇന്ത്യ തന്നെ ജയിച്ചു. ഇതോടെ അവസാന എൻഡിന് മുമ്പ് ഇന്ത്യയ്ക്ക് 178-176ന്റെ ലീഡുണ്ടായിരുന്നു. നിർണായക ഘട്ടത്തിൽ ചൈനയെ മറികടന്ന് ഇന്ത്യ മികച്ച ഷോട്ടുകളുമായി മുന്നേറി. അവസാന എൻഡിലും ഇന്ത്യ കരുത്ത് കാട്ടി ചൈനയെ മറികടന്ന് സ്വർണം സ്വന്തമാക്കുകയായിരുന്നു. ഫൈനലിൽ ദക്ഷിണ കൊറിയ കുറിച്ച ലോക റെക്കോർഡിനൊപ്പമെത്താനും ഇന്ത്യൻ സംഘത്തിന് കഴിഞ്ഞുവെന്നതും ചരിത്ര മുഹൂർത്തമായി.
India made a strong start at the Asian Games in Nagoya, winning gold in the women’s compound archery team event. Jyothi Surekha Vennam, Chikhita Taniparthy and Prithika Pradeep defeated China in the final. India later won another gold in the compound mixed team event, beating South Korea in a shoot-off. The women’s team also matched South Korea’s world-record score.
|
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |