ഇംഗ്ലണ്ട് നാണംകെടുത്തി, പാകിസ്ഥാന് ഐസിസി വക പണിയും; പോയിന്റ് പട്ടികയിൽ ഏറ്റവും പിന്നിൽ,​ ഒമ്പത് ടെസ്റ്റിൽ ഏഴിലും തോൽവി

ന്യൂഡൽഹി: ഇംഗ്ലണ്ടിനെതിരായ ടെസ്റ്റ് പരമ്പരയിൽ 0-3ന് നാണംകെട്ട തോൽവി ഏറ്റുവാങ്ങിയ പാകിസ്ഥാനെ തേടി വീണ്ടും തിരിച്ചടി. എഡ്ജ്ബാസ്റ്റണിൽ നടന്ന മൂന്നാം ടെസ്റ്റിലെ കുറഞ്ഞ ഓവർ നിരക്കിന്റെ പേരിൽ പാകിസ്ഥാന് ലോക ടെസ്റ്റ് ചാമ്പ്യൻഷിപ്പിൽ 11 പോയിന്റ് നഷ്ടമായി. താരങ്ങൾക്ക് മത്സരഫീസിന്റെ 50 ശതമാനം പിഴയും ചുമത്തി.

ശിക്ഷയ്ക്ക് പിന്നാലെ ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ പാകിസ്ഥാൻ ഒമ്പതാം സ്ഥാനത്താണ്. ഒമ്പത് മത്സരങ്ങളിൽ രണ്ട് ജയവും ഏഴ് തോൽവിയുമാണ് പാകിസ്ഥാന്റെ സമ്പാദ്യം. പോയിന്റ് ശതമാനം 4.63 ആയി താഴ്ന്നു. മറ്റ് ടീമുകളുമായി താരതമ്യം ചെയ്താൽ പാകിസ്ഥാന്റെ സ്ഥിതി പരിതാപകരമാണ്. ബർമിംഗ്ഹാമിൽ നടന്ന മൂന്നാം ടെസ്റ്റിൽ നിശ്ചിത സമയത്തിനുള്ളിൽ 11 ഓവർ കുറവാണ് പാകിസ്ഥാൻ എറിഞ്ഞത്. ഇതേത്തുടർന്നാണ് അന്താരാഷ്ട്ര ക്രിക്കറ്റ് കൗൺസിലിന്റെ (ഐ.സി.സി) നടപടി.

പോയിന്റ് പട്ടികയിൽ പാക് ടീം ഒമ്പതാം സ്ഥാനത്താണെങ്കിൽ 30 പോയിന്റും 20.83 ശതമാനം പോയിന്റുമായി വെസ്റ്റിൻഡീസ് തൊട്ടുമുന്നിലാണ്. ശ്രീലങ്ക 33.33 ശതമാനവുമായി ഏഴാമതും പാകിസ്ഥാനെതിരായ പരമ്പര 3-0ന് സ്വന്തമാക്കിയ ഇംഗ്ലണ്ട് 38.54 ശതമാനവുമായി ആറാമതുമാണ്. 68 പോയിന്റും 51.52 ശതമാനം പോയിന്റ് ശതമാനവുമുള്ള ഇന്ത്യ അഞ്ചാം സ്ഥാനത്ത്. 80 ശതമാനം പോയിന്റ് ശതമാനത്തോടെ 96 പോയിന്റുമായി ഓസ്‌ട്രേലിയയാണ് ഒന്നാം സ്ഥാനത്ത്; ദക്ഷിണാഫ്രിക്ക 75 ശതമാനവുമായി രണ്ടാമതും ന്യൂസിലൻഡ് 72.22 ശതമാനവുമായി മൂന്നാമതും ബംഗ്ലാദേശ് 55.56 ശതമാനവുമായി നാലാമതുമാണ്.

അതേസമയം നവംബറിലാണ് പാകിസ്ഥാന്റെ അടുത്ത ടെസ്റ്റ് ചാമ്പ്യൻഷിപ്പിനുള്ള പരമ്പര. സ്വന്തം മണ്ണിൽ ലങ്കയ്‌ക്കെതിരെയാണ് രണ്ട് ടെസ്റ്റുകൾ. റാവൽപിണ്ടിയിലും ലാഹോറിലുമാണ് മത്സരങ്ങൾ നടക്കുക.