'സ്വന്തം ടീമംഗങ്ങളുമായി മത്സരിക്കാൻ ഒട്ടും താൽപര്യമില്ല,​ സമ്മർദ്ദത്തോടെയല്ല ആസ്വദിച്ച് കളിക്കാനാണ് താൽപര്യം': സഞ്ജു സാംസൺ

ദുബായ്: സമ്മർദ്ദത്തോടെ കളിക്കാനല്ല ആസ്വദിച്ച് കളിക്കാനാണ് താൻ ഇഷ്‌ടപ്പെടുന്നതെന്ന് വ്യക്തമാക്കി സഞ്ജു സാംസൺ. ജിയോസ്റ്റാറിലെ ഷോയിൽ പറഞ്ഞ കാര്യങ്ങൾക്ക് വ്യക്തത നൽകുകയായിരുന്നു താരം. 'സ്വന്തം ടീമംഗങ്ങളുമായി മത്സരിക്കാൻ താൽപര്യമില്ലാത്ത ക്യാരക്‌ടറാണ് തന്റേത്. കളിക്കേണ്ടത് എതിർടീം താരങ്ങളോട്. ഇന്ന് അവരെ തോൽപ്പിക്കണം,​ നിർണായക മത്സരമാണ് എന്നുകണ്ട് കളിക്കാനാണിഷ്‌ടം.'- സഞ്ജു പറഞ്ഞു. വേൾഡ് കപ്പ് കഴിഞ്ഞല്ല വേൾഡ് കപ്പിന് മുൻപ് ന്യൂസിലാന്റ് ടൂർ കഴിഞ്ഞാണ് അങ്ങനെ തോന്നിയതെന്നാണ് താൻ പറഞ്ഞത്. അങ്ങനെ തന്നെ മുന്നോട്ട് കൊണ്ടുപോകാനാണ ്താൽപര്യം. സമ്മർദ്ദത്തോടെയല്ല,​ ആസ്വദിച്ച് കളിക്കാനാണ് ഇഷ്‌ടമെന്നും സഞ്ജു കൂട്ടിച്ചേർത്തു. 'ആരും എന്നെ ഗൈഡ് ചെയ്യണ്ട എന്ന് പറഞ്ഞത് ഈ ഉദ്ദേശത്തോടെയാണ്'- സഞ്ജു പറയുന്നു.

'ക്രിക്കറ്റ് ഒരു ടീം ഗെയിമാണ്. ഞാൻ പറഞ്ഞത് സാധാരണ കാര്യങ്ങൾ മാത്രമാണ്. ക്രിക്കറ്റിൽ കയറ്റിറക്കങ്ങൾ സ്വാഭാവികമാണ്. അനാവശ്യ സമ്മർദ്ദങ്ങളൊന്നും ആഗ്രഹിക്കുന്നില്ല. പറയേണ്ടത് പറയാം.സമൂഹമാദ്ധ്യമങ്ങൾ പലതും പലരീതിയിലാക്കും. എന്റെ കോൺഫിഡൻസ് കൂടുകയാണുണ്ടായത്. നല്ല കുറേ മത്സരങ്ങൾ കളിക്കാൻ കഴിഞ്ഞു.'- സഞ്ജു വ്യക്തമാക്കി. സാധാരണ കാര്യങ്ങൾ മാത്രമാണ് പറഞ്ഞത്.മുഴുവൻ അഭിമുഖവും കണ്ടാൽ അത് മനസിലാകുമെന്നും സഞ്ജു വ്യക്തമാക്കി. ഇന്ത്യൻ ടീമിലെ സ്ഥാനത്തിനായി ഇനി മത്സരിക്കാനില്ലെന്നും ഇന്ത്യൻ ക്രിക്കറ്റ് സെലക്ഷനുമായി ബന്ധപ്പെട്ട എലിപ്പന്തയത്തിൽ നിന്നും വിട്ടുനിൽക്കാൻ താൻ തീരുമാനിച്ചെന്ന് സഞ്ജു ജിയോസ്റ്റാറിലെ ഷോയിൽ പറഞ്ഞിരുന്നു.