മോദിക്ക് സീഷെൽസ് ബഹുമതി

ന്യൂഡൽഹി: പ്രധാനമന്ത്രി നരേന്ദ്രമോദിക്ക് സീഷെൽസിലെ 'ഗാർഡിയൻ ഓഫ് ദി ബ്ലൂ ഹൊറൈസൺ’ പ്രസിഡൻഷ്യൽ ബഹുമതി നൽകി ആദരിച്ചു. സെയ്ഷെൽസ് സന്ദർശനത്തിനിടെ പ്രസിഡന്റ് ഡോ. പാട്രിക് ഹെർമിനിയാണ് പ്രത്യേക ചടങ്ങിൽ ബഹുമതി സമ്മാനിച്ചത്. മോദിക്ക് ലഭിക്കുന്ന 34-ാം അന്താരാഷ്ട്ര പുരസ്‌കാരമാണിത്.

പ്രധാനമന്ത്രിയുടെ നേതൃത്വം, വികസ്വര രാജ്യങ്ങളുടെ താത്‌പര്യങ്ങൾ സംരക്ഷിക്കൽ, കാലാവസ്ഥാവ്യതിയാനത്തിനെതിരായ പ്രവർത്തനങ്ങൾ, സമുദ്രവിഭവങ്ങളുടെ സുസ്ഥിര പരിപാലനം തുടങ്ങിയവയ്‌ക്കുള്ള അംഗീകാരമായാണ് ബഹുമതി.

സീഷെൽസുമായുള്ള നയതന്ത്രബന്ധത്തിന്റെ 50-ാം വാർഷികം ആഘോഷിക്കുന്ന വേളയിൽ അംഗീകാരം, ഇരുരാജ്യങ്ങളും തമ്മിലുള്ള സവിശേഷമായ സൗഹൃദം കൂടുതൽ മെച്ചപ്പെടുത്താൻ സഹായകമാണെന്ന് പ്രധാനമന്ത്രി പറഞ്ഞു. കാലാവസ്ഥാ വ്യതിയാനം, പരിസ്ഥിതി സംരക്ഷണം തുടങ്ങിയവയ്‌ക്കായി പ്രവർത്തിക്കുന്ന രാജ്യങ്ങൾക്ക് അവാർഡ് സമർപ്പിക്കുകയാണെന്ന് അദ്ദേഹം കൂട്ടിച്ചേർത്തു.