സഞ്ജു ഫോമായ സന്തോഷത്തിൽ 82 ജീവനക്കാർക്ക് 3500 രൂപ സമ്മാനം സഞ്ജുവിന്റെ സർപ്രൈസ് 'എൻട്രി'യിൽ ഞെട്ടി നിതിൻ

കോട്ടയം: ട്വന്റി-20 ലോകകപ്പിൽ ഇന്ത്യ വിജയിച്ച സന്തോഷത്തിനൊപ്പം, ടീമിന്റെ വിജയശല്പി സഞ്ജു സാംസൺ തന്നെ തേടി വന്നതിന്റെ അദ്ഭുതത്തിലും സന്തോഷത്തിലുമാണ് പാമ്പാടി ഫിയ ഗാർമെന്റ്‌സ് ഉടമ നിതിൻ ബാബു. സഞ്ജുവിന്റെ ആരാധകനായ പാമ്പാടി ഏഴാംമൈൽ മറ്റത്തിൽ വീട്ടിൽ നിതിൻ,​ സഞ്ജു ലോകകപ്പ് ക്വാർട്ടർ,​സെമി,​ഫൈനൽ മത്സരങ്ങളിൽ ഫോമായതിന്റെ സന്തോഷത്തിൽ തന്റെ കടയിലെ 82ജീവനക്കാർക്ക് 3500 രൂപ വീതം നൽകി സന്തോഷം പങ്കുവച്ചത് സാമൂഹ്യമാദ്ധ്യമങ്ങളിൽ വൈറലായിരുന്നു. 2ദിവസം മുൻപാണ് എറണാകുളം കടവന്ത്രയിലുള്ള നിതിന്റെ ബന്ധുവീട്ടിൽ സഞ്ജു എത്തിയത്. നിതിൻ,​ ഭാര്യ ബ്ലെസി, മക്കളായ ഫിയ, ജുവൻ, ജാൻവീർ, ഫെറാൻ, കിയാര എന്നിവർക്കൊപ്പം ഒന്നരമണിക്കൂറോളം താരം ചെലവഴിച്ചു. വീട്ടുകാരുമൊത്ത് ക്രിക്കറ്റ് കളിച്ചതിന് ശേഷം ഭക്ഷണവും കഴിച്ചാണ് സഞ്ജു മടങ്ങിയത്. ക്വാർട്ടറിന് ശേഷം ജീവനക്കാർക്ക് 500 രൂപയും സെമി കഴിഞ്ഞ് 1000രൂപയും,​ ഫൈനലിൽ 2000 രൂപയും വീതമാണ് നിതിൽ നൽകിയത്. കൂടാതെ, വിവിധ സെക്ഷനുകളിലെ എട്ട് ജീവനക്കാർക്ക് ഗോവയ്ക്ക് ട്രിപ്പും നൽകിയിട്ടുണ്ട്.