വിജയ് കോൺഗ്രസുമായി കൈകോർക്കുമോ? സസ്‌പെൻസ് നിറച്ച് തമിഴ്നാട്, സാദ്ധ്യതകൾ ഇങ്ങനെ

ചെന്നൈ: തമിഴ്‌നാട് രാഷ്ട്രീയത്തിൽ അഞ്ചു പതിറ്റാണ്ടായി നിലനിന്നിരുന്ന ദ്രാവിഡ രാഷ്ട്രീയ സമവാക്യങ്ങളെ തകർത്തെറിഞ്ഞുകൊണ്ടാണ് കന്നി അങ്കത്തിൽ വിജയ്‍യുടെ തമിഴക വെട്രി കഴകം ചരിത്ര വിജയം നേടിയത്. 234 മണ്ഡലങ്ങളിൽ നടന്ന വാശിയേറിയ പോരാട്ടത്തിൽ 107 സീറ്റുകൾ സ്വന്തമാക്കി ടിവികെ ഏറ്റവും വലിയ ഒറ്റകക്ഷിയായി മാറി. ഇതോടെ സംസ്ഥാനത്തെ അടുത്ത സർക്കാർ രൂപീകരണത്തിന് ടിവികെയുടെ പങ്ക് നിർണായകമാകും. ഭരണകക്ഷിയായ ഡിഎംകെ 74 സീറ്റുകളുമായി രണ്ടാം സ്ഥാനത്തേക്ക് പിന്തള്ളപ്പെട്ടപ്പോൾ 52 സീറ്റുകൾ നേടിയ എഐഎഡിഎംകെ മൂന്നാം സ്ഥാനത്തായി. ഡിഎംകെ സഖ്യത്തിലുള്ള കോൺഗ്രസ് അഞ്ച് സീറ്റും എഐഎഡിഎംകെ സഖ്യത്തിലുള്ള പിഎംകെ നാല് സീറ്റുമാണ് നേടിയത്.

107 സീറ്റുകൾ നേടി ഒന്നാം സ്ഥാനത്തെത്തിയെങ്കിലും, കേവല ഭൂരിപക്ഷമായ 118 സീറ്റിൽ നിന്ന് ടിവികെ ഏതാനും സീറ്റുകൾ അകലെയാണ്. തമിഴ്‌നാട്ടിലെ രാഷ്ട്രീയ ചരിത്രത്തിൽ പുതു അദ്ധ്യായം രചിച്ച ഈ വിജയത്തിന് പിന്നാലെ സർക്കാർ രൂപീകരണ ചർച്ചകൾ സജീവമാവുകയാണ്. സഖ്യ സാധ്യതകളെക്കുറിച്ചുള്ള തീവ്രമായ ചർച്ചകളാണ് ഉടലെടുക്കുന്നത്. ഭൂരിപക്ഷം നേടാൻ ടിവികെ മറ്റ് ചെറിയ പാർട്ടികളുടെ പിന്തുണ തേടാനുള്ള സാദ്ധ്യതയുണ്ടെന്നാണ് വിവരം.

പലവിധത്തിലുള്ള സാദ്ധ്യതകളാണ് ഉയരുന്നത്. ഭരണകക്ഷിയായ ഡിഎംകെ 74 സീറ്റുകളുമായി രണ്ടാം സ്ഥാനത്തേക്ക് പിന്തള്ളപ്പെടുകയും എഐഎഡിഎംകെ 52 സീറ്റുകൾ മാത്രം നേടുകയും ചെയ്തതോടെ, ഡിഎംകെയെ തമിഴ്‌നാട്ടിൽ അധികാരത്തിൽ നിന്ന് അകറ്റി നിർത്താൻ എഐഎഡിഎംകെ വിജയ്‌യുമായി കൈകോർക്കുമോയെന്നതാണ് ആദ്യത്തെ സാദ്ധ്യത.

മറ്റൊന്ന് ടിവികെ കോൺഗ്രസുമായും സ്വതന്ത്ര സ്ഥാനാർത്ഥികളുമായും കൈകോർത്ത് സർക്കാർ രൂപീകരിക്കുക എന്നതാണ്. വിജയ്ക്ക് കോൺഗ്രസ് ഇതിനകം തന്നെ പിന്തുണ നൽകിയിട്ടുണ്ട്, ടിവികെയുടെ അതിശയകരമായ പ്രകടനത്തിന് ശേഷം രാഹുൽ ഗാന്ധിയും വിജയ്‍യുമായി സംസാരിച്ചിരുന്നു. ടിവികെയ്ക്ക് 107 സീറ്റുകളും കോൺഗ്രസിന് അഞ്ച് സീറ്റുകളും ഉള്ളതിനാൽ, ഏറ്റവും വലിയ ഒറ്റകക്ഷിക്ക് ഭൂരിപക്ഷം തികയ്ക്കാൻ മറ്റ് പ്രാദേശിക പാർട്ടികളുടെയും സ്വതന്ത്ര സ്ഥാനാർത്ഥികളുടെയും പിന്തുണ ആവശ്യമാണ്. വോട്ടെണ്ണൽ സമയത്ത്, ഫലങ്ങൾ ടിവികെയ്ക്ക് അനുകൂലമായി വരാൻ തുടങ്ങിയപ്പോൾ, അവർ സ്വന്തമായി സർക്കാർ രൂപീകരിക്കുമെന്നാണ് പാർട്ടി പറഞ്ഞത്.

ചർച്ചകൾക്കിടയിൽ വിജയ് സംസ്ഥാനത്തിന്റെ ചുമതലയുള്ള ഗവർണർ രാജേന്ദ്ര ആർലേക്കറിന് കത്തെഴുതി സർക്കാർ രൂപീകരിക്കാൻ അനുമതി തേടിയിട്ടുണ്ട്. രണ്ടാഴ്ചയ്ക്കുള്ളിൽ ഭൂരിപക്ഷം തെളിയിക്കുമെന്നാണ് വിജയ് അവകാശപ്പെടുന്നത്. വിജയ് ഇന്ന് ജയിച്ച സ്ഥാനാർത്ഥികളുമായി കൂടിക്കാഴ്ച നടത്തും.