കത്തിയമരരുത് ടൂറിസം സാദ്ധ്യതകൾ

ഹൗസ് ബോട്ടുകളിൽ തുടർച്ചയായി ഉണ്ടാകുന്ന തീപിടത്തങ്ങൾ ആലപ്പുഴയിലെ ടൂറിസം മേഖലയെ കടുത്ത ആശങ്കയിലാഴ്ത്തുകയാണ്. ഒരു വർഷത്തിനിടെ ചെറുതും വലുതുമായ നിരവധി തീപിടിത്തങ്ങളാണ് റിപ്പോർട്ട് ചെയ്യപ്പെട്ടത്. ഒരു ആഡംബര ഹൗസ് ബോട്ട് നിർമ്മിക്കാൻ 40 ലക്ഷം രൂപ മുതൽ 1.5 കോടി രൂപ വരെയാണ് ചെലവ്. കഴിഞ്ഞ വർഷം മാത്രമുണ്ടായ അപകടങ്ങളിലായി 3 മുതൽ 5 കോടി രൂപ വരെ നഷ്ടം ഉടമകൾക്ക് സംഭവിച്ചതായി കണക്കുകൾ വ്യക്തമാക്കുന്നു. എൻജിൻ, തടി ഘടനകൾ, എയർ കണ്ടീഷണറുകൾ, ആഡംബര അലങ്കാരങ്ങൾ എന്നിവ പൂർണമായി കത്തിനശിക്കുന്നതാണ് നഷ്ടത്തിന്റെ ആക്കം കൂട്ടുന്നത്.

ഹൗസ് ബോട്ടുകളിലെ അടുക്കളകളിൽ ഗ്യാസ് സിലിണ്ടറുകളും ഹോസുകളും കൃത്യമായ സുരക്ഷാ പരിശോധനയില്ലാതെ ഉപയോഗിക്കുന്നത് ഗ്യാസ് ചോർച്ചയ്ക്കും വലിയ പൊട്ടിത്തെറികൾക്കും കാരണമാകുന്നു. രാത്രിയിൽ ലൈറ്റുകൾ, എയർ കണ്ടീഷണറുകൾ, ഇൻവെർട്ടറുകൾ തുടങ്ങിയവ തുടർച്ചയായി പ്രവർത്തിപ്പിക്കുന്നതിലൂടെ ഗുണനിലവാരമില്ലാത്ത വയറിംഗുകൾ ചൂടായി ഉണ്ടാകുന്ന ഷോർട്ട് സർക്യൂട്ടും തീപടരാനിടയാക്കുന്നുണ്ട്.

ബോട്ട് യാർഡുകളിലും മറ്റും നിറുത്തിയിട്ട് അറ്റകുറ്റപ്പണികൾ നടത്തുമ്പോൾ (ഗ്യാസ് വെൽഡിംഗ്, തടിപ്പണികൾ) ഉണ്ടാകുന്ന തീപ്പൊരികൾ, ഉണങ്ങിയ തടിയിലേക്കും ഫൈബറിലേക്കും പടരുന്നതും അപകടങ്ങൾക്ക് വഴിവയ്ക്കുന്നു. പല ബോട്ടുകളിലും കാലാവധി കഴിഞ്ഞ ഫയർ എക്സ്റ്റിംഗുഷിറുകളാണ് ഉള്ളത്. അപായ മുന്നറിയിപ്പ് നൽകുന്ന ഫയർ അലാറങ്ങളും സ്മോക്ക് ഡിറ്റക്ടറുകളും പ്രവർത്തനക്ഷമമല്ലാത്തതും തിരിച്ചടിയാണ്.

അട്ടിമറി സാദ്ധ്യത
നിലവിൽ റിപ്പോർട്ട് ചെയ്യപ്പെട്ട സംഭവങ്ങളിൽ അട്ടിമറി സാന്നിദ്ധ്യമോ ആസൂത്രിത ആക്രമണങ്ങളോ പൊലീസോ ഫയർഫോഴ്സോ സ്ഥിരീകരിച്ചിട്ടില്ല. ഭൂരിഭാഗം അപകടങ്ങളും സാങ്കേതിക തകരാറുകൾ, അറ്റകുറ്റപ്പണികളിലെ വീഴ്ചകൾ, പാചകവാതക ചോർച്ച എന്നിവ മൂലമാണ് സംഭവിച്ചിട്ടുള്ളത്.

എങ്കിലും ഇൻഷ്വറൻസ് തുക തട്ടിയെടുക്കാനുള്ള ശ്രമങ്ങളോ വ്യക്തിവൈരാഗ്യങ്ങളോ ഇതിനു പിന്നിലുണ്ടോ എന്ന കാര്യത്തിൽ പൊലീസ് വിശദമായ അന്വേഷണങ്ങൾ നടത്താറുണ്ട്. കരമാർഗം എളുപ്പത്തിലെത്താൻ കഴിയാത്ത, വിജനമായ കായൽതീരങ്ങളിൽ കെട്ടിയിടുന്ന ബോട്ടുകളിലുണ്ടാകുന്ന അപകടങ്ങൾ സുരക്ഷാ ഏജൻസികൾ നിരീക്ഷിച്ചു വരികയാണ്.

ടൂറിസം മേഖലയ്ക്കേൽപ്പിക്കുന്ന ആഘാതം
കേരളത്തിന്റെ വിനോദസഞ്ചാര ഭൂപടത്തിലെ പ്രധാന ആകർഷണമാണ് ആലപ്പുഴയിലെ ഹൗസ് ബോട്ട് യാത്ര. ആലപ്പുഴയുടെ സാമ്പത്തിക വ്യവസ്ഥയുടെ നട്ടെല്ലുകൂടിയാണ് ഈ മേഖല. തടിയിൽ നിർമ്മിച്ച ബോട്ടുകളിൽ തീ വേഗത്തിൽ പടരുന്നതിനാൽ വിദേശികളും സ്വദേശികളുമായ സഞ്ചാരികളിൽ ഇതുവലിയ സുരക്ഷാ ഭീതി സൃഷ്ടിക്കുന്നുണ്ട്. അപകടങ്ങൾ വർദ്ധിക്കുന്നതോടെ ഹൗസ് ബോട്ടുകൾക്ക് ഇൻഷ്വറൻസ് പ്രീമിയം തുക വർദ്ധിക്കാനും സാദ്ധ്യതയേറുന്നു. 'ഗോഡ്സ് ഓൺ കൺട്രി" എന്ന കേരള ടൂറിസത്തിന്റെ ആഗോള ബ്രാൻഡിംഗിനു ഈ സുരക്ഷാവീഴ്ചകൾ മങ്ങലേൽപ്പിക്കുമെന്ന ആശങ്കയുമുണ്ട്.

പരിഹാര മാർഗങ്ങളും നിർദ്ദേശങ്ങളും
കായൽ ടൂറിസത്തിന്റെ വിശ്വാസ്യത വീണ്ടെടുക്കാൻ കർശന നടപടികൾ അത്യാവശ്യമാണ്.

പോർട്ട് ഡിപ്പാർട്ട്‌മെന്റും ഫയർ ഫോഴ്‌സും ചേർന്ന് എല്ലാ ബോട്ടുകളുടെയും വയറിംഗും ഗ്യാസ് കണക്ഷനുകളും ലളിതമായ ഇടവേളകളിൽ ഓഡിറ്റ് ചെയ്യണം. ഹൗസ് ബോട്ടുകളിൽ നിർബന്ധമായും എൽ.പി.ജി ലീക്ക് ഡിറ്റക്ടറുകളും ഓട്ടോമാറ്റിക് ഫയർ എക്സ്റ്റിംഗുഷറുകളും ഘടിപ്പിക്കണം. അടിയന്തര സാഹചര്യങ്ങളിൽ തീയണയ്ക്കാനും യാത്രക്കാരെ സുരക്ഷിതമായി ഒഴിപ്പിക്കാനും ബോട്ട് ജീവനക്കാർക്ക് കൃത്യമായ മോക്ക് ഡ്രില്ലുകളും പരിശീലനവും നൽകണം. ലൈസൻസും സുരക്ഷാ മാനദണ്ഡങ്ങളും പാലിക്കാതെ സർവീസ് നടത്തുന്ന ബോട്ടുകൾക്കെതിരെ കർശന നിയമനടപടികൾ സ്വീകരിക്കേണ്ടതുണ്ട്. ഹൗസ് ബോട്ട് ഉടമകളും ടൂറിസം വകുപ്പും ചേർന്നുള്ള കൂട്ടായ സുരക്ഷാ മുൻകരുതലുകളിലൂടെ മാത്രമേ ആലപ്പുഴയുടെ കായൽ വിനോദസഞ്ചാര മേഖലയെ പ്രതിസന്ധിയിൽ നിന്ന് സംരക്ഷിക്കാൻ സാധിക്കൂ.

വേണം, അതീവ ജാഗ്രത

#ബോട്ടിന്റെ വലിപ്പമനുസരിച്ച് ഫയർ എക്സ്റ്റിംഗുഷറുകൾ പ്രവർത്തനക്ഷമമായ അവസ്ഥയിൽ സൂക്ഷിക്കണം. ഇവയുടെ റീഫില്ലിംഗ് തീയതി വ്യക്തമായി രേഖപ്പെടുത്തിയിരിക്കണം

#ബോട്ടുകളിലെ അടുക്കളയിൽ എൽ.പി.ജി ചോർച്ച കണ്ടെത്താൻ ഗ്യാസ് ലീക്ക് ഡിറ്റക്ടറുകളും മുറികളിലും കോമൺ ഏരിയകളിലും ഫയർ അലാറം/ സ്മോക്ക് ഡിറ്റക്ടറുകൾ എന്നിവ നിർബന്ധമാക്കണം

#പാചകവാതക സിലിണ്ടറുകൾ ബോട്ടിനു പുറത്ത് വായുസഞ്ചാരമുള്ള പ്രത്യേക സുരക്ഷിത കെട്ടുകളിൽ വയ്ക്കണം. കോപ്പർ അല്ലെങ്കിൽ ഹൈ- പ്രഷർ സുരക്ഷാ പൈപ്പുകൾ മാത്രമേ ഗ്യാസ് ലൈനിനായി ഉപയോഗിക്കാവൂ

#അടുക്കളയ്ക്ക് സമീപം ഉണങ്ങിയ മണൽ നിറച്ച ബക്കറ്റുകൾ തീയണയ്ക്കാൻ കരുതണം

#ഉയർന്ന ഗുണനിലവാരമുള്ള വയറിംഗുകൾ ഉപയോഗിക്കണം. ഷോർട്ട് സർക്യൂട്ട് ഒഴിവാക്കാൻ കൃത്യമായ ഫ്യൂസ് സിസ്റ്റങ്ങൾ സജ്ജീകരിക്കണം

#ഇൻവെർട്ടറുകളും ജനറേറ്ററുകളും തുടർച്ചയായി പ്രവർത്തിക്കുമ്പോൾ ചൂടാകുന്നത് തടയാൻ കൃത്യമായ വെന്റിലേഷൻ ബോക്സുകൾ സ്ഥാപിക്കണം

#എൻജിൻ റൂമിൽ ഇന്ധനച്ചോർച്ചയോ എണ്ണക്കറയോ ഉണ്ടാകരുത്. ഇന്ധന ടാങ്കുകൾ എക്‌സ്‌ഹോസ്റ്റ് പൈപ്പുകളിൽ നിന്ന് സുരക്ഷിതമായ അകലത്തിൽ ആയിരിക്കണം

#ബോട്ടിലുള്ള ആകെ യാത്രക്കാരുടെയും ജീവനക്കാരുടെയും എണ്ണത്തേക്കാൾ 10% കൂടുതൽ ലൈഫ് ജാക്കറ്റുകൾ ലഭ്യമായിരിക്കണം. കുട്ടികൾക്കുള്ള പ്രത്യേക ലൈഫ് ജാക്കറ്റുകളും സൂക്ഷിക്കണം

#അടിയന്തര ഘട്ടങ്ങളിൽ വെള്ളത്തിലേക്ക് എറിഞ്ഞു കൊടുക്കാവുന്ന ലൈഫ് റിംഗുകൾ ബോട്ടിന്റെ ഇരുവശങ്ങളിലും എളുപ്പത്തിൽ എടുക്കാവുന്ന രീതിയിൽ ഘടിപ്പിക്കണം

#അത്യാവശ്യ മരുന്നുകളും മുറിവുണക്കാനുള്ള സാമഗ്രികളും അടങ്ങിയ ഫസ്റ്റ് എയ്ഡ് ബോക്സ് എല്ലാ ബോട്ടിലും നിർബന്ധമാണ്
#പോർട്ട് ഡിപ്പാർട്ട്‌മെന്റിന്റെ കടുത്ത സുരക്ഷാ സർവേ പൂർത്തിയാക്കി ഓരോ വർഷവും ഫിറ്റ്നസ് സർട്ടിഫിക്കറ്റ് പുതുക്കണം

#ബോട്ട് ഓടിക്കുന്ന ഡ്രൈവർക്കും ജീവനക്കാർക്കും സർക്കാരിന്റെ അംഗീകൃത കോമ്പറ്റൻസി സർട്ടിഫിക്കറ്റ് ഉണ്ടായിരിക്കണം

#പെർമിറ്റിൽ അനുവദിച്ചിട്ടുള്ള എണ്ണത്തിൽ കൂടുതൽ യാത്രക്കാരെ കയറ്റാൻ പാടില്ല