കുവൈറ്റിൽ ജോലി വാഗ്ദാനം ചെയ്ത് പീഡനം; നാലുപ്രതികൾക്ക് തടവും പി​ഴയും ശി​ക്ഷ

അടൂർ: ജോലിക്കായി​ കുവൈറ്റിൽ എത്തിച്ച യുവതിയെ മുറിയിൽ പൂട്ടിയിട്ട് പീഡി​പ്പി​ച്ചക്കേസിൽ നാലുപ്രതികൾക്ക് അടൂർ ഫാസ്റ്റ് ട്രാക്ക് കോടതി തടവും പിഴയും ശി​ക്ഷ വിധിച്ചു. 2013 ൽ ആണ് കേസി​ന് ആസ്പദമായ സംഭവം. കുരമ്പാല പറന്തൽ പുല്ലുപറമ്പിൽ പുത്തൻവീട്ടിൽ ജോളി സ്റ്റാൻലി (57), തിരുവല്ല കവിയൂർ താഴത്ത് ഉപ്പൻകര വീട്ടിൽ മുരളീധരൻ നായർ (72), ആലുവ ചൂണ്ടി വില്ലേജിൽ മരക്കാരത്ത് പറമ്പിൽ ബിജുമോൻ (നവാസ് - 55), തിരുവല്ല കവിയൂർ ഞാലികണ്ടം താഴത്ത് ഉപ്പൻകര വീട്ടിൽ സതീഷ് കുമാർ (40) എന്നിവരെയാണ് അടൂർ ഫാസ്റ്റ് ട്രാക്ക് കോടതി ജഡ്ജ് ടി.മഞ്ജിത്ത് കുറ്റക്കാരെന്ന് കണ്ടെത്തി ശിക്ഷ വിധിച്ചത്. അടൂർ സ്വദേശി​നി​യാണ് പരാതി​ക്കാരി​.

ജോലി നൽകാമെന്ന് പ്രലോഭിപ്പിച്ച് പണം കൈപ്പറ്റുകയും കുവൈറ്റിൽ എത്തിച്ച ശേഷം മുറിയിൽ പൂട്ടിയിട്ട് നിരവധി തവണ ബലാത്സംഗത്തിനിരയാക്കുകയും ചെയ്യുകയായിരുന്നു. രക്ഷപ്പെട്ട് നാട്ടിലെത്തിയ പരാതിക്കാരിയെ ഭീഷണിപ്പെടുത്തുകയും വീണ്ടും ഉപദ്രവിക്കാൻ ശ്രമിക്കുകയും ചെയ്തു. 2014 ൽ ആണ് കേസ് രജിസ്റ്റർ ചെയ്തത്.

ഒന്നാംപ്രതി ഇടനി​ലക്കാരി​ ജോളി സ്റ്റാൻലിക്ക് മൂന്നുമാസം തടവും ആയിരം രൂപ പിഴയും ശിക്ഷ വിധിച്ചു. രണ്ടാം പ്രതി മുരളീധരൻ നായർക്ക് ആറു വർഷവും മൂന്നുമാസവും തടവും 53,000 രൂപ പിഴയുമാണ് ശിക്ഷ. മൂന്നാം പ്രതി ബിജുമോൻ 37 വർഷവും 9 മാസവും തടവ് ശി​ക്ഷ അനുഭവി​ക്കണം. 3,03,000 രൂപ പിഴയും നൽകണം. നാലാംപ്രതി സതീഷ് കുമാറി​ന് നാലുവർഷം തടവും 25000 രൂപ പിഴയുമാണ് ശിക്ഷ. അടൂർ പൊലീസ് സ്റ്റേഷൻ ഇൻസ്പെക്ടർ ആയിരുന്ന പ്രജീഷ്.ടി.ഡി ആണ് അന്വേഷണം പൂർത്തിയാക്കി കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ അഡ്വ.റോഷൻ തോമസ് ഹാജരായി.