റിയാസിനും വീണയ്ക്കുമെതിരെ തോമസ്  ഐസക്കിന്റെ പേഴ്​സണൽ സ്റ്റാഫിന്റെ വിമർശനം

ആലപ്പുഴ: മാസപ്പടികേസ്​ പാർട്ടിയുടെ പ്രശ്നമല്ലെന്നും​ അതിനെ ന്യായീകരിക്കാനുള്ള സ്​പേസ്​ പോലും മുഹമ്മദ്​ റിയാസ്​ ഇല്ലാതാക്കിയെന്നും​​ മുൻമന്ത്രി ഡോ. തോമസ്​ ഐസക്കിന്റെ പേഴ്​സണൽ സ്റ്റാഫ്​ അംഗവും ഇടതു സഹയാത്രികനുമായ ഗോപകുമാർ മുകുന്ദൻ. വീണയുടെ ബുക്കിലെ വിവരങ്ങൾ​​ ഭാവി ബിസിനസിന്റെ ഭാഗമായി എഴുതിയതാണെന്ന മുഹമ്മദ്​ റിയാസിന്റെ പ്രതികരണത്തിന്​ പിന്നാലെ ഫേസ്​ബുക്ക് കുറിപ്പിലൂടെയാണ്​ വിമർശനം. നിലവിൽ പുറത്തുവന്ന നോട്ട്​ പാഡ്​ പേജിനെ റിയാസ്​ നിഷേധിക്കുന്നില്ല. വീണ ട്രാൻസ്​ഫർ​ ചെയ്തുവെന്ന്​ പറയുന്ന 85 ലക്ഷംരൂപ എന്തിനാണ്​ കൊടുത്തത്​. എങ്ങനെയാണ് കൊടുത്തത്, ബാങ്ക് അക്കൗണ്ട് വഴിയാണോ. അതിന്റെ ഉറവിടം എന്താണ് എന്നീ ചോദ്യങ്ങൾ ഉന്നയിക്കുന്നു. എന്തോ ഫ്യൂച്ചർ ബിസിനസിനാണ് എന്നാണ് റിയാസ് പറയുന്നത്. ഇങ്ങനെ കഷ്ണം കഷ്ണമായി കാശ് കൊടുത്തു നടത്തുന്ന ഫ്യൂച്ചർ ബിസിനസിന്റെ മോഡൽ എന്താണ്,​ ചിട്ടി പോലെയുള്ള ഏർപ്പാടു വല്ലതുമാണോ? വീണയും റിയാസും ഇത്തരം കാര്യങ്ങൾ നേരേ ചൊവ്വേ പറയണമെന്നും അദ്ദേഹം കുറിപ്പിൽ പറയുന്നു.