ശബരിമലയിൽ ദിവസം അഞ്ച് പടിപൂജ

കൊച്ചി: ശബരിമലയിൽ ദിവസം അഞ്ച് വീതം പടി പൂജ നടത്താൻ തീരുമാനിച്ചതാതി തിരുവിതാംകൂർ ദേവസ്വം ബോർഡ് ഹൈക്കോടതിയിൽ അറിയിച്ചു. പടി പൂജ ബുക്ക് ചെയ്തവരുടെ പേരുകൾ ഡിജിറ്റലൈസ് ചെയ്യുമെന്നും മരിച്ചവരുടെ പേരുകൾ ഒഴിവാക്കുമെന്നും വിശദീകരിച്ചു. ജസ്റ്റിസ് വി. രാജ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരുൾപ്പെട്ട ദേവസ്വം ബെഞ്ചാണ് വിഷയം പരിഗണിച്ചത്.

പട്ടികയിൽ നിലവിലുള്ള ക്രമത്തിൽ പടിപൂജ പൂർത്തിയാക്കിയ ശേഷമേ പുതിയ ബുക്കിംഗ് സ്വീകരിക്കൂവെന്ന് ബോർഡ് നേരത്തെ അറിയിച്ചിരുന്നു.2040 വരെ 705 പേരാണ് പടി പൂജ ബുക്ക് ചെയ്തിരിക്കുന്നത്. 1,37,900 രൂപയാണ് നിരക്ക്. മണ്ഡല, മകര വിളക്ക് സീസണിൽ പടി പൂജയില്ല.

കോടതിയുടെ നിർദ്ദേശങ്ങൾ

• കൊപ്രാക്കളത്തിന് സമീപത്തെ പെറ്റിഷോപ്പ് ഉടൻ നീക്കം ചെയ്യണം.
• ചാലക്കയം -പമ്പ റോഡിന്റെ 15 കോടിയുടെ പുനരുദ്ധാരണം സംബന്ധിച്ച് പൊതുമരാമത്ത് വകുപ്പ് റിപ്പോർട്ട് നൽകണം. ജോലികൾ പൂർത്തിയാക്കുന്ന സമയക്രമം അറിയിക്കണം.
• നിർമ്മാണം പൂർത്തിയായ അന്നദാന മണ്ഡപം ഉപയോഗിക്കാത്തതിന്റെ കാരണം ദേവസ്വം ബോർഡ് അറിയിക്കണം.