ശരീരഭാരം കുറയ്ക്കാനും ആരോഗ്യസംരക്ഷണത്തിനും ഈ ഇലയുടെ തോരൻ മാത്രം മതി: രുചിയിലും കേമൻ

വിറ്റാമിനുകളും ആന്റിഓക്സിഡന്റുകളും നിറഞ്ഞ പോഷകസമൃദ്ധമായ ഒന്നാണ് ഉലുവ ഇല. രക്തത്തിലെ പഞ്ചസാരയുടെ അളവ് കൃത്യമായി നിലനിർത്താൻ ഇത് സഹായിക്കുന്നു. ദഹനസംബന്ധമായ പ്രശ്നങ്ങൾക്ക് മികച്ച പ്രതിവിധിയാണിത്. കൊളസ്ട്രോൾ കുറയ്ക്കുന്നതിനും ശീരഭാരം കുറയ്ക്കാൻ ആഗ്രഹിക്കുന്നവർക്കും ഉലുവ ഇല ഭക്ഷണത്തിൽ ഉൾപ്പെടുത്തുന്നത് നല്ലതാണ്. അത്തരത്തിൽ രുചികരവും ആരോഗ്യകരവുമായ ഒരു ഉലുവ ഇല തോരൻ നമുക്ക് തയ്യാറാക്കാം.

ആവശ്യമായ ചേരുവകൾ

• ഉലുവ ഇല (ചെറുതായി അരിഞ്ഞത്)​- മൂന്നുപിടി
• സവാള (ചെറുതായി അരിഞ്ഞത്)​- ഒരെണ്ണം
• പച്ചമുളക്- മൂന്നെണ്ണം
• തേങ്ങ (ചിരകിയത്)​- അരക്കപ്പ്
• മഞ്ഞൾപ്പൊടി- കാൽ ടീസ്‌പൂൺ
• വെളിച്ചെണ്ണ- ആവശ്യത്തിന്
• ഉപ്പ്- പാകത്തിന്
• കടുക്
• കറിവേപ്പില
• വറ്റൽമുളക്- മൂന്നെണ്ണം

തയ്യാറാക്കുന്നവിധം

ആദ്യം ചീനച്ചട്ടി അടുപ്പിൽവച്ച് ചൂടായതിന് ശേഷം ആവശ്യത്തിന് വെളിച്ചെണ്ണ ഒഴിച്ചുകൊടുക്കണം. വെളിച്ചെണ്ണ ചൂടായതിന് ശേഷം കടുക് പൊട്ടിച്ച് കറിവേപ്പിലയും വറ്റൽമുളകും ഇട്ടുകൊടുക്കാം. ഇനി ഇതിലേയ്ക്ക് സവാളയും പച്ചമുളകും ചേർത്ത് നന്നായി വഴറ്റണം. സവാളയുടെ നിറം മാറി വരുമ്പോൾ മഞ്ഞൾപ്പൊടിയും ആവശ്യത്തിന് ഉപ്പും ചേർക്കണം.

കഴുകി വൃത്തിയാക്കി ചെറുതായി അരിഞ്ഞുമാറ്റിവച്ചിരിക്കുന്ന ഉലുവ ഇല ഇതിലേയ്ക്ക് ചേർത്ത് നന്നായി ഇളക്കി യോജിപ്പിക്കണം. വെള്ളം ചേർക്കാതെ മീഡിയം തീയിൽ അടച്ചുവച്ചുവേണം വേവിക്കാൻ. ഇല വെന്തുകഴിയുമ്പോൾ തേങ്ങ ചിരകിയത് ചേർക്കുക. ശേഷം വെള്ളം വറ്റുന്നതുവരെ ഇത് നന്നായി ഇളക്കണം. രുചികരമായ ഉലുവ ഇല തോരൻ തയ്യാർ.