40 വർഷത്തെ കാത്തിരിപ്പ്... കോഴിക്കോട്, മുതലമട,പറമ്പിക്കുളം കെ.എസ്.ആർ.ടി.സി ബസ് ഉടൻ

മുതലമട: പറമ്പിക്കുളം വനത്തിലേക്കും മുതലമടയിലേക്കും നേരിട്ട് ബസ് സർവീസ് എന്ന നാട്ടുകാരുടെ നാല് പതിറ്റാണ്ടിലേറെയുള്ള സ്വപ്നം സാക്ഷാത്കാരത്തിലേക്ക്. കാലിക്കറ്റ് സിറ്റി സഹകരണ സംഘം കെ.എസ്.ആർ.ടി.സിക്ക് സമ്മാനമായി നൽകുന്ന പുതിയ ബസ് കോഴിക്കോട്-കോല്ലങ്കോട്-മുതലമട-പറമ്പിക്കുളം റൂട്ടിൽ ഉടൻ സർവീസ് ആരംഭിക്കും. കാലിക്കറ്റ് സിറ്റി സഹകരണ സംഘത്തിന്റെ പൊതുനന്മ ഫണ്ടിൽ നിന്ന് 40 ലക്ഷം രൂപ മുടക്കിയാണ് ആഢംബര ബസ് വാങ്ങി കെ.എസ്.ആർ.ടി.സിക്ക് നൽകിയത്. സംഘത്തിന്റെ ഡയറക്ടർ സി.എൻ.വിജയകൃഷ്ണൻ മന്ത്രി സി.പി.ജോണിന് ബസിന്റെ താക്കോൽ കൈമാറി. ഇത്തരത്തിൽ സഹകരണ സംഘം കെ.എസ്.ആർ.ടി.സിക്ക് ബസ് നൽകുന്നത് കേരളത്തിൽ ആദ്യമാണ്. ബസ് സ‌ർവീസിന്റെ പ്രാരംഭ നടപടികൾ ഉടൻ ആരംഭിക്കുമെന്ന് മന്ത്രി സി.പി.ജോൺ അറിയിച്ചു. 40 വർഷത്തെ കാത്തിരിപ്പിന് ശേഷം വരുന്ന ഈ ബസ് മലയോര മേഖലയുടെ വികസനത്തിന് വലിയ കൈത്താങ്ങാകുമെന്ന പ്രതീക്ഷയിലാണ് നാട്ടുകാർ.

 ചരിത്രം

ഈ ബസിന് പിന്നിൽ ഒരു നീണ്ട ചരിത്രമുണ്ട്. 2011ൽ നിയമസഭാ തെരഞ്ഞെടുപ്പ് കാലത്ത് നെന്മാറ മണ്ഡലം യു.ഡി.എഫ് സ്ഥാനാർത്ഥിയായിരുന്ന സി.എൻ.വിജയകൃഷ്ണൻ ആണ് ആദ്യമായി ഈ ആവശ്യം ഉന്നയിച്ചത്. അന്ന് മുതലമടയിലെ ജനങ്ങളുടെ യാത്രാദുരിതം നേരിട്ട് കണ്ടതോടെയാണ് കോഴിക്കോട് നിന്ന് പറമ്പിക്കുളത്തേക്ക് നേരിട്ട് ബസ് വേണമെന്ന ആവശ്യം അന്നത്തെ ഗതാഗത മന്ത്രി ആന്റണി രാജുവിന് സമർപ്പിച്ചത്. പിന്നീട് സർക്കാർ മാറിയെങ്കിലും ആവശ്യം അട്ടിമറിക്കപ്പെട്ടു. ഇപ്പോൾ പുതിയ സർക്കാർ വന്നപ്പോൾ പ്രഖ്യാപിച്ച 'സമ്മാന" പദ്ധതിയിലൂടെയാണ് ബസ് സർവീസ് യാഥാർത്ഥ്യമാകുന്നത്.

 ഗ്രാമപഞ്ചായത്തിന്റ തെക്കേ അറ്റത്ത് തമിഴ്നാട് അതിർത്തിയോട് ചേർന്ന് സ്ഥിതി ചെയ്യുന്ന പറമ്പിക്കുളം തേക്കടി വനമേഖലയിലെ ആദിവാസി ജനവിഭാഗങ്ങൾക്ക് പഞ്ചായത്ത് ഓഫീസ്, വില്ലേജ് ഓഫീസ്, കൃഷി ഭവൻ, കുടുംബാരോഗ്യ കേന്ദ്രം എന്നിവയ്ക്കായി കൊല്ലങ്കോടും മുതലമടയിലും എത്താൻ ഈ ബസ്സിനെ ആശ്രയിക്കാം.
 ടൂറിസ്റ്റുകൾക്കും വനത്തിലെ ജീവനക്കാർക്കും കോഴിക്കോട് നിന്ന് നേരിട്ട് പറമ്പിക്കുളത്ത് എത്താൻ അവസരം.

 ആദിവാസിമേഖലയിലെ ഉൾപ്പെടെയുളള വിദ്യാർത്ഥികൾക്ക് യാത്രാക്ലേശം വലിയതോതിൽ കുറയും.

ഫോട്ടോ: സി.എൻ. വിജയകൃഷ്ണൻ.