വിലക്കയറ്റത്തിന് ബ്രേക്ക്, സ്വർണവില താഴേക്ക്: ആഭരണം വാങ്ങാൻ തയ്യാറെടുക്കുന്നവർക്ക് ആശ്വാസം, ഇന്നത്തെ നിരക്കറിയാം

തിരുവനന്തപുരം: സംസ്ഥാനത്ത് തുടർച്ചയായ രണ്ട് ദിവസത്തെ ഇടവേളയ്ക്ക് ശേഷം സ്വർണവില വീണ്ടും കുറയുന്നു. ഇന്ന് ഗ്രാമിന് 35 രൂപയും പവന് 280 രൂപയുമാണ് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 1,05,760 രൂപയായി. ഇന്നലെ ഗ്രാമിന് 25 രൂപയും പവന് 200 രൂപയും കൂടിയിരുന്നു. കഴിഞ്ഞ കുറേ ദിവസങ്ങളായി സ്വർണവിലയിൽ ഏറ്റക്കുറച്ചിൽ തുടരുകയാണ്.

രാജ്യാന്തര വിപണിയിലെ മാറ്റങ്ങളാണ് സംസ്ഥാനത്തെ സ്വർണവിലയിലും പ്രതിഫലിക്കുന്നത്. അന്താരാഷ്ട്ര വിപണിയിലെ തുടർച്ചയായ മാറ്റവും സുരക്ഷിത നിക്ഷേപമെന്ന നിലയിൽ സ്വർണം വാങ്ങുന്നവരുടെ വർദ്ധനവുമാണ് സ്വർണവിലയിലെ മാറ്റങ്ങൾക്ക് കാരണമാകുന്നതെന്നാണ് വിലയിരുത്തൽ. വെള്ളിവിലയിൽ മാറ്റമില്ലാതെ തുടരുകയാണ്. ഒരു ഗ്രാം വെള്ളിയുടെ വില 235 രൂപയാണ്. കേരളത്തിൽ വിവാഹ സീസൺ ഉടനെ ആരംഭിക്കുന്നതിനാൽ വിപണിയിലെ തുടർച്ചയായ മാറ്റം സ്വർണം വാങ്ങിക്കാൻ തയ്യാറെടുക്കുന്നവ‌ർക്ക് കനത്ത ആശങ്കയാണ് നൽകുന്നത്.