പ്രവാസികൾക്ക് വൻ ലാഭത്തിൽ സ്വർണം വാങ്ങാം; യുഎഇയിലുള്ളവ‌ർ ശ്രദ്ധിക്കൂ

ദുബായ്: ഇന്ത്യയിൽ സ്വർണവില കുതിച്ചുയരുകയാണ്. കുറച്ചുദിവസത്തെ വില ഇടിവിന് ശേഷമാണ് പിന്നീട് ദിനംപ്രതി വില വർദ്ധിക്കാൻ തുടങ്ങിയത്. എന്നാൽ, പ്രവാസികളെ ഇതൊന്നും ബാധിച്ചിട്ടില്ല. നാട്ടിലേക്ക് സ്വർണം കൊണ്ടുവരുന്ന പ്രവാസികൾക്ക് ആശ്വാസമാണ്. കാരണം ദുബായിൽ സ്വർണവിലയിൽ മാറ്റമില്ല. 21 കാരറ്റ് സ്വർണം ഗ്രാമിന് 400 ദിർഹം (10,430 രൂപ) ആണ് ഇന്നത്തെ വില.

ദുബായ് ജുവലറി ഗ്രൂപ്പിന്റെ കണക്കുപ്രകാരം, 24 കാരറ്റ് സ്വർണം ഗ്രാമിന് 526.75 ദിർഹവും (13,735 രൂപ) 22 കാരറ്റ് സ്വർണത്തിന് 487.25 ദിർഹവുമാണ് (12,705 രൂപ) ഇന്നത്തെ വില. കേരളത്തിലെ സ്വർണവില അനുസരിച്ച് നോക്കുമ്പോൾ ഇത് കുറവാണ്. അതിനാൽ പ്രവാസികൾക്ക് ഇന്ത്യയേക്കാൾ ലാഭത്തിന് സ്വർണം വാങ്ങാം.

അതേസമയം, വെള്ളിവില 0.8 ശതമാനം വർദ്ധിച്ച് ഔൺസിന് 66.12 ഡോളറിലെത്തി. എന്നാൽ, വരും ദിവസങ്ങളിൽ സ്വർണവില വർദ്ധിക്കാൻ സാദ്ധ്യതയുണ്ടെന്നാണ് വിദഗ്ദ്ധർ പറയുന്നത്. പശ്ചിമേഷ്യൻ സംഘർഷവും അതിൽ ഏത് പക്ഷമാണ് ശക്തിപ്രാപിക്കുന്നത് എന്നതും ആശ്രയിച്ചാണ് ഇപ്പോൾ മൊത്തത്തിലുള്ള സ്വർണവിലയിലെ മാറ്റങ്ങളുണ്ടാകുന്നത്.