പാകിസ്ഥാൻ ക്രിക്കറ്റിന് വലിയ തിരിച്ചടി; സംപ്രേക്ഷണവകാശത്തിന് പോലും ആളില്ല, 208 കോടി പ്രതീക്ഷിച്ചിടത്ത് കിട്ടിയത് പാതിവില

ലാഹോർ: പാകിസ്ഥാൻ ക്രിക്കറ്റ് ബോർഡിന് (പിസിബി) കനത്ത തിരിച്ചടി. സ്വന്തം മണ്ണിൽ നടക്കുന്ന 25 അന്താരാഷ്‌ട്ര മത്സരങ്ങളുടെ സംപ്രേക്ഷണാവകാശം പ്രതീക്ഷിച്ച തുകയുടെ പകുതിയോളം വിലയ്‌ക്കാണ് ബോർഡിന് വിൽക്കേണ്ടിവന്നത്. 200 കോടിക്ക് മുകളിൽ വില നിശ്ചയിച്ചിരുന്ന ടെൻഡറിൽ സർക്കാർ ഉടമസ്ഥതയിലുള്ള പാകിസ്ഥാൻ ടെലിവിഷൻ (പിടിവി) മാത്രമാണ് വിലവാഗ്ദാനം ചെയ്‌തുകൊണ്ടുള്ള ബിഡ് സമർപ്പിച്ചത്. 100 കോടിയോളം വിലയ്‌ക്കാണ്‌ പിടിവി സംപ്രേക്ഷണാവകാശം സ്വന്തമാക്കിയത്.

മുൻകാലങ്ങളിൽ ഒന്നിലധികം ബ്രോ‌ഡ്‌കാസ്റ്റർമാർ ഒരുമിച്ചുചേർന്ന് കൺസോർഷ്യമായാണ് പാകിസ്ഥാൻ ക്രിക്കറ്റിന്റെ സംപ്രേക്ഷണവകാശത്തിനായി അപേക്ഷ സമർപ്പിച്ചിരുന്നത്. എന്നാൽ, ഇത്തവണ കൺസോർഷ്യമായി പങ്കെടുക്കാൻ പിസിബി അനുമതി നൽകിയിരുന്നില്ല. ഇതാണ് ടെൻഡറിലെ മത്സരം കുറയാൻ കാരണമായതെന്നാണ് റിപ്പോർട്ട്.

പുതിയ കരാറിന്റെ ഭാഗമായി അഞ്ച് ടെസ്റ്റുകളും 14 ഏകദിനങ്ങളും ആറ് ട്വന്റി20 മത്സരങ്ങളും ഉൾപ്പെടെ 25 അന്താരാഷ്‌ട്ര മത്സരങ്ങളുടെ സംപ്രേക്ഷണവാകാശമാണ് പിടിവിയ്‌ക്ക് ലഭിക്കുന്നത്. ഈ മാസം ശ്രീലങ്കയ്‌ക്കെതിരെ മൂന്ന് ട്വന്റി20 മത്സരങ്ങളാണ് പാകിസ്ഥാൻ കളിക്കുക. തുടർന്ന് ഇംഗ്ലണ്ട് ഉൾപ്പെടുന്ന ഏഴ് മത്സരങ്ങളുടെ ത്രിരാഷ്‌ട്ര ഏകദിന പരമ്പര നടക്കും. അടുത്ത മാസം ശ്രീലങ്കയ്‌ക്കെതിരെ രണ്ട് ടെസ്റ്റ് മത്സരങ്ങളും പാകിസ്ഥാൻ കളിക്കും.