'മറ്റേതെങ്കിലും ടീമിലായിരുന്നെങ്കിൽ ഗില്ലിന് ട്വന്റി-20യിൽ സ്ഥാനം ഉറപ്പ്', ഇന്ത്യൻ നായകനെ പ്രശംസിച്ച് മുൻ താരം വസീം ജാഫർ 

തിരുവനന്തപുരം: ഇന്ത്യൻ ക്രിക്കറ്റ് ടീമിന്റെ ടെസ്റ്റ്, ഏകദിന നായകൻ ശുഭ്മാൻ ഗില്ലിനെ പ്രശംസിച്ച് മുൻ ഇന്ത്യൻ താരം വസീം ജാഫർ. മറ്റേതെങ്കിലും ഒരു രാജ്യത്തിന്റെ ടീമിലായിരുന്നെങ്കിൽ ഗിൽ അനായാസം ട്വന്റി-20 ഇലവനിൽ ഇടം നേടുമായിരുന്നുവെന്നാണ് ജാഫറിന്റെ അഭിപ്രായം. തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ വെസ്റ്റ് ഇൻഡീസിനെതിരായ ആദ്യ ഏകദിനത്തിൽ 110 റൺസെടുത്ത ഗില്ലിന്റെ പ്രകടനത്തിന് പിന്നാലെയായിരുന്നു ജാഫറിന്റെ പ്രതികരണം.

മത്സരത്തിലെ സെഞ്ച്വറിയോടെ ഗിൽ ഏകദിനത്തിലെ പത്താം ശതകം പൂർത്തിയാക്കി. അഭിഷേക് ശർമ്മ, വൈഭവ് സൂര്യവംശി, സഞ്ജു സാംസൺ, ഇഷാൻ കിഷൻ തുടങ്ങിയ താരങ്ങളുടെ ട്വന്റി-20 ടീമിലെ കടുത്ത മത്സരമാണ് ഗില്ലിന് സ്ഥാനം ഉറപ്പിക്കാനാകാത്തതിന് കാരണമെന്ന് ജാഫർ പറഞ്ഞു.

ട്വന്റി-20യിലെ മുൻനിര സ്ഥാനങ്ങൾക്കായി കടുത്ത മത്സരം നടക്കുന്നതിനാൽ ആണ് ഗില്ലിന് ടീമിൽ ഇടം നേടുന്നത് പ്രയാസമായതെന്നും ജാഫർ ചൂണ്ടിക്കാട്ടി. 2025 ഡിസംബറിലായിരുന്നു. ഗില്ലിന്റെ അവസാന ട്വന്റി-20 അന്താരാഷ്ട്ര മത്സരം. ഏകദിനത്തിലെ ഗില്ലിന്റെ പ്രകടനത്തെ ജാഫർ പ്രത്യേകം പ്രശംസിച്ചു. വിരാട് കൊഹ്‌ലിയുടെ പാരമ്പര്യം ഏകദിന ക്രിക്കറ്റിൽ മുന്നോട്ടുകൊണ്ടുപോകാൻ ഗില്ലിന് കഴിയുമെന്നും അദ്ദേഹം പറഞ്ഞു. ചെറുപ്പത്തിൽ തന്നെ നായകനെന്ന നിലയിൽ ഗിൽ കാട്ടുന്ന പക്വത ഇന്ത്യൻ ക്രിക്കറ്റിന് പ്രതീക്ഷ നൽകുന്നതാണെന്നും ജാഫർ അഭിപ്രായപ്പെട്ടു.

ഈ വർഷം ഏകദിനത്തിൽ ഇന്ത്യക്കായി ഏറ്റവും കൂടുതൽ റൺസ് നേടിയ താരമാണ് ഗിൽ. ഒൻപത് ഇന്നിങ്സുകളിൽനിന്ന് 671 റൺസാണ് താരം നേടിയത്. ശരാശരി 95.85. ആദ്യ ഏകദിനത്തിൽ വെസ്റ്റ് ഇൻഡീസ് ഉയർത്തിയ 296 റൺസ് വിജയലക്ഷ്യം ഇന്ത്യ 41.4 ഓവറിൽ രണ്ട് വിക്കറ്റ് നഷ്ടത്തിലാണ് മറികടന്നത്. ഗിൽ 110 റൺസെടുത്തപ്പോൾ കൊഹ്‌ലി പുറത്താകാതെ 139 റൺസുമായി തിളങ്ങി. ഇതോടെ മൂന്ന് മത്സര പരമ്പരയിൽ ഇന്ത്യ 1-0ന് മുന്നിലെത്തി.