ബംഗ്ലാദേശിനെതിരായ ഏക ടെസ്റ്റിൽ അട്ടിമറി ജയം,​ ചരിത്രം കുറിച്ച് സിംബാബ്‌വെ

ഹരാരെ: ഏക ടെസ്റ്റ് മത്സരത്തിൽ ബംഗ്ലാദേശിനെ ഇന്നിംഗ്‌സിനും 85 റൺസിനും തകർത്ത് സിംബാബ്‌വെക്ക് അട്ടിമറി ജയം. ടെസ്റ്റ് ക്രിക്കറ്റ് ചരിത്രത്തിൽ സിംബാബ്‌വെയുടെ ഏറ്റവും വലിയ വിജയമാണിത്. ഇതോടെ ബംഗ്ലാദേശിനെതിരെ കളിച്ച അവസാന മൂന്ന് ടെസ്റ്റുകളിൽ രണ്ടിലും വിജയം നേടാൻ സിംബാബ്‌വെക്കായി.

ആദ്യ ഇന്നിം‌ഗ്‌സിൽ വെറും 140 റൺസിന് പുറത്തായ ബംഗ്ലാദേശിന് രണ്ടാം ഇന്നിം‌ഗ്‌സിലും രക്ഷയുണ്ടായില്ല. ഇന്ന് മൂന്നാം ദിനം കളി പുനഃരാരംഭിച്ച സന്ദർശകർ 185 റൺസിന് എല്ലാവരും കൂടാരം കയറുകയായിരുന്നു. നാല് വിക്കറ്റ് വീഴ്ത്തിയ ബ്ലെസിംഗ് മുസരബാനിയും മൂന്ന് വിക്കറ്റ് നേടിയ നായകൻ റിച്ചാർഡ് എൻഗാരവയും ചേർന്നാണ് ബംഗ്ലാദേശ് ബാറ്റിംഗ് നിരയെ തകർത്തത്. സെഞ്ച്വറിയോടെ സിംബാബ്‌വെയെ ഒന്നാം ഇന്നിം‌ഗ്‌സിൽ 410 റൺസെന്ന മികച്ച സ്‌കോറിലേക്ക് നയിച്ച ഇന്നസെന്റ് കയ്യ ആണ് മാൻ ഓഫ് ദി മാച്ച്.

ഒന്നാം ഇന്നിം‌ഗ്‌സിൽ തകർച്ച നേരിട്ട ബംഗ്ലാദേശ്, രണ്ടാം ഇന്നിം‌ഗ്‌സിൽ ഒരു വിക്കറ്റിന് 40 റൺസ് എന്ന നിലയിലാണ് മൂന്നാം ദിനം ബാറ്റിംഗ് ആരംഭിച്ചത്. എന്നാൽ സിംബാബ്‌വെ ബൗളർമാർക്ക് മുന്നിൽ അവർക്ക് അടിപതറി. 22 റൺസെടുത്ത ഓപ്പണർ മഹ്മൂദുൽ ഹസൻ ജോയിയെ മുസരബാനിയുടെ പന്തിൽ ബ്രയാൻ ബെന്നറ്റ് ക്യാച്ചെടുത്ത് പുറത്താക്കിയതോടെയാണ് തകർച്ചയ്ക്ക് തുടക്കമായത്. തൊട്ടുപിന്നാലെ മോമിനുൽ ഹഖും പുറത്തായതോടെ ബംഗ്ലാദേശ് 48ന് മൂന്ന് വിക്കറ്റ് എന്ന നിലയിലേക്ക് വീണു.

പിന്നീട് ഒത്തുചേർന്ന മുഷ്ഫിഖുർ റഹീമും (34) ക്യാപ്‌ടൻ നജ്മുൽ ഹൊസൈൻ ഷാന്റോയും (30) ചേർന്ന് 61 റൺസ് കൂട്ടിച്ചേർത്തെങ്കിലും ആ ചെറുത്തുനിൽപ്പും അധിക സമയം നീണ്ടുനിന്നില്ല. ഇരുവരും പുറത്തായതോടെ ബംഗ്ലാദേശിന്റെ പതനം പൂർത്തിയായി.