യു.എ.ഇ ലോകത്തിന് മാതൃകയായ മാനവിക രാഷ്ട്രം: വെള്ളാപ്പള്ളി

ആലപ്പുഴ : ലോകത്തിലെ ഏറ്റവും മികച്ച വികസന മാതൃകകളിലൊന്നായി യു.എ.ഇയെ ഉയർത്തിയ ദുബായ് ഭരണാധികാരിയും യു.എ.ഇ വൈസ് പ്രസിഡന്റുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന് ജന്മദിനാശംസകൾ നേർന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. പദ്മഭൂഷൺ ലഭിച്ചതി​ന് യു.എ.ഇയിലെ എസ്.എൻ.ഡി.പി യോഗം സേവനത്തിന്റെ ഭാരവാഹികൾ നൽകി​യ ആദരമേറ്റുവാങ്ങി​ സംസാരി​ക്കുകയായി​രുന്നു അദ്ദേഹം​.

മനുഷ്യരെ ചേർത്തുപിടിക്കുന്ന സംസ്കാരമാണ് ഒരു രാജ്യത്തിന്റെ ഏറ്റവും വലിയ ശക്തി. ആ മഹത്തായ സന്ദേശം ഭരണത്തിലൂടെ ലോകത്തിന് കാണിച്ചു തന്ന രാജ്യമാണ് യു.എ.ഇ. ജാതിയുടെയും മതത്തിന്റെയും ഭാഷയുടെയും ദേശത്തിന്റെയും അതിരുകൾക്കപ്പുറം മനുഷ്യനെ ആദരിക്കുകയും സംരക്ഷിക്കുകയും ചെയ്യുന്ന ഭരണ സംവിധാനമാണ് ഈ രാജ്യം ലോകത്തിന് മുന്നിൽ അവതരിപ്പിച്ചിരിക്കുന്നത്. വികസനത്തിന്റെ കാര്യത്തിൽ മാത്രമല്ല, മാനവികതയി​ലും യു.എ.ഇ ഇന്ന് ലോകത്തിന് മാതൃകയാണ്..ലക്ഷക്കണക്കിന് മലയാളികൾക്ക് തൊഴിലും സുരക്ഷിത ജീവിതവും സാമ്പത്തിക ഭദ്രതയും സമ്മാനിച്ച രാജ്യമാണ്,.കേരളത്തിന്റെ വികസനത്തിൽ പ്രവാസികളുടെ വിയർപ്പിലൂടെ ലഭിച്ച സംഭാവനകൾക്ക് നിർണായക സ്ഥാനമുണ്ടെന്നും വെള്ളാപ്പള്ളി ചൂണ്ടിക്കാട്ടി.

കണിച്ചുകുളങ്ങരയി​ൽ നടന്ന ചടങ്ങി​ൽ സേവനം യൂണി​യൻ ഭാരവാഹി​കൾ ഉപഹാരം സമ്മാനി​ച്ചു​. .യോഗം യു.എ.ഇ കോ ഓർഡിനേറ്ററും പന്തളം യൂണിയൻ പ്രസിഡന്റുമായ അഡ്വ.സിനിൽ മുണ്ടപ്പള്ളി, അബുദാബി യൂണിയൻ കൺവീനർ ചാറ്റർജി കായംകുളം, ഷാർജ യൂണിയൻ കൗൺസിലർ കലേഷ്, യു.എ.ഇ മുൻ സെൻട്രൽ കമ്മിറ്റി സെക്രട്ടറി ശ്രീധരൻ പ്രസാദ് തുടങ്ങിയവർ പങ്കെടുത്തു.