മനുഷ്യ കവചം മുതൽ എഐ സാങ്കേതികവിദ്യവരെ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ സുരക്ഷാ രഹസ്യങ്ങൾ

45 വർഷങ്ങൾക്ക് മുമ്പ് നടന്ന ഒരു കുപ്രസിദ്ധ വെടിവയ്പിന്റെ ഓർമ്മപ്പെടുത്തലാണ് ദിവസങ്ങൾക്ക് മുമ്പ് വാഷിംഗ്ടൺ ഹിൽട്ടൺ ഹോട്ടലിൽ അരങ്ങേറിയത്. 1981 മാർച്ച് 30ന് അന്നത്തെ യു.എസ് പ്രസിഡന്റ് റൊണാൾഡ് റീഗന് നേരെ വധശ്രമമുണ്ടായത് ഹോട്ടലിന്റെ മുന്നിൽ വച്ചാണ്. അന്ന് റീഗനാണെങ്കിൽ ഇന്ന് ട്രംപ്. ലോകത്തിൽ ഏറ്റവും വലിയ സുരക്ഷാ സംവിധാനമുള്ള ട്രംപിന് നേരെ ഉണ്ടായ വെടിവയ്പ്പ് ലോകം ഞെട്ടലോടെയാണ് നോക്കിക്കണ്ടത്.

ലോകത്തിലെ ഏറ്റവും ശക്തനായ വ്യക്തികളിൽ ഒരാളായ അമേരിക്കൻ പ്രസിഡന്റ് ഡൊണാൾഡ് ട്രംപിന് ചുറ്റും ഒരു അദൃശ്യമായ കോട്ട തന്നെയുണ്ട്. അദ്ദേഹത്തിന്റെ സുരക്ഷയ്ക്കായി വിന്യസിച്ചിരിക്കുന്ന സംവിധാനങ്ങൾ ഏതൊരു ശത്രുവിനെയും അമ്പരപ്പിക്കുന്നതാണ്. അമേരിക്കൻ സീക്രട്ട് സർവീസ് നിയന്ത്രിക്കുന്ന ഈ സുരക്ഷാ വലയത്തിൽ മനുഷ്യ കവചങ്ങൾ മുതൽ അത്യാധുനിക ആർട്ടിഫിഷ്യൽ ഇന്റലിജൻസ് വരെയുണ്ട്.

1. സീക്രട്ട് സർവീസ്
പ്രസിഡന്റിന്റെ സുരക്ഷയുടെ ഏറ്റവും പ്രധാനപ്പെട്ട ഭാഗം സീക്രട്ട് സർവീസ് ഏജന്റുകളാണ്. കറുത്ത സ്യൂട്ടും സൺഗ്ലാസും ധരിച്ചെത്തുന്ന ഇവർ വെറുമൊരു അംഗരക്ഷകരല്ല. അത്യാധുനിക യുദ്ധമുറകളിലും ആയുധ പ്രയോഗങ്ങളിലും വിദഗ്ധ പരിശീലനം ലഭിച്ചവരാണിവർ. പ്രസിഡന്റിന് നേരെ ഒരു ആക്രമണം ഉണ്ടായാൽ സ്വന്തം ശരീരം കവചമാക്കി അദ്ദേഹത്തെ സംരക്ഷിക്കാൻ ഇവർ ബാധ്യസ്ഥരാണ്.

2. ദി ബീസ്റ്റ്
ഡൊണാൾഡ് ട്രംപ് സഞ്ചരിക്കുന്ന ഔദ്യോഗിക കാറായ 'ദി ബീസ്റ്റ്' ലോകത്തിലെ ഏറ്റവും സുരക്ഷിതമായ വാഹനമാണ്. ഏകദേശം എട്ടിഞ്ച് കനമുള്ള കവചിത പാളികളാണ് ഇതിനുള്ളത്. വെടിയുണ്ടകളോ ബോംബ് സ്ഫോടനങ്ങളോ ഈ വാഹനത്തെ തകർക്കില്ല. രാസായുധ ആക്രമണമുണ്ടായാൽ ഉള്ളിലുള്ളവരെ സംരക്ഷിക്കാൻ സീൽ ചെയ്ത കാബിനും പ്രത്യേക ഓക്സിജൻ സപ്ലൈയും. പ്രസിഡന്റിന്റെ രക്ത ഗ്രൂപ്പിലുള്ള രക്തം എപ്പോഴും ഈ കാറിൽ കരുതിയിരിക്കും.

3. എയർ ഫോഴ്സ് വൺ
ആകാശത്തെ വൈറ്റ് ഹൗസ് എന്നാണ് ട്രംപിന്റെ വിമാനം അറിയപ്പെടുന്നത്. ഏത് മിസൈൽ ആക്രമണത്തെയും പ്രതിരോധിക്കാൻ ശേഷിയുള്ള ജാമറുകളും മറ്റ് സംവിധാനങ്ങളും ഇതിലുണ്ട്. ഒരു ആറ്റോമിക് സ്ഫോടനം നടന്നാൽ പോലും അതിന്റെ തരംഗങ്ങളെ പ്രതിരോധിക്കാൻ ഈ വിമാനത്തിന് സാധിക്കും.

4. ആർട്ടിഫിഷ്യൽ ഇന്റലിജൻസ് സുരക്ഷ
ആധുനിക കാലത്ത് ഡ്രോണുകളും സൈബർ ആക്രമണങ്ങളും ഭീഷണിയായതോടെ സുരക്ഷാ സംവിധാനങ്ങളിൽ എഐയും ഇടംപിടിച്ചു കഴിഞ്ഞു. തത്സമയ നിരീക്ഷണത്തിനും, മുഖം തിരിച്ചറിയാനുള്ള സാങ്കേതികവിദ്യയ്ക്കും (Facial Recognition), സംശയാസ്പദമായ നീക്കങ്ങൾ മുൻകൂട്ടി പ്രവചിക്കാനും എഐ അധിഷ്ഠിത ക്യാമറകൾ സഹായിക്കുന്നു.

5. കൗണ്ടർ സ്നൈപ്പർ ടീം
പ്രസിഡന്റ് പങ്കെടുക്കുന്ന ഏത് പൊതുപരിപാടിയിലും കെട്ടിടങ്ങളുടെ മുകളിൽ അത്യാധുനിക ടെലിസ്കോപ്പിക് തോക്കുകളുമായി സ്നൈപ്പർമാർ നിലയുറപ്പിക്കും. കിലോമീറ്ററുകൾ അകലെയുള്ള ഭീഷണി പോലും നിമിഷങ്ങൾക്കുള്ളിൽ ഇല്ലാതാക്കാൻ ഇവർക്ക് കഴിയും.

6. ഇന്റലിജൻസ് നെറ്റ്‌വർക്ക്
ട്രംപ് എവിടേക്ക് യാത്ര ചെയ്യുന്നതിന് ആഴ്ചകൾക്ക് മുൻപ് തന്നെ സീക്രട്ട് സർവീസ് അവിടം സന്ദർശിക്കുകയും ലോക്കൽ പൊലീസുമായി ചേർന്ന് സുരക്ഷാ പ്ലാൻ തയ്യാറാക്കുകയും ചെയ്യും. സൈബർ ലോകത്തെ ഭീഷണികൾ നിരീക്ഷിക്കാൻ പ്രത്യേക സംഘം 24 മണിക്കൂറും പ്രവർത്തിക്കുന്നു.