ആർട്ട് ഓഫ് ലിവിംഗ് പ്രചോദന വൃക്ഷം: പ്രധാനമന്ത്രി

ബംഗളൂരു: ശ്രീ ശ്രീ രവിശങ്കർ വിത്തു പാകിയ ആർട്ട് ഓഫ് ലിവിംഗ് ഇന്ന് ലോകമെമ്പാടുമുള്ള ആളുകളെ പ്രചോദിപ്പിക്കുന്ന വൃക്ഷമായി വളർന്നെന്ന് പ്രധാനമന്ത്രി നരേന്ദ്രമോദി. ബംഗളൂരുവിൽ ആർട്ട് ഓഫ് ലിവിംഗിന്റെ 45-ാം വാർഷികവും ശ്രീ ശ്രീ രവിശങ്കറിന്റെ 70-ാം പിറന്നാൾ ആഘോഷവുമായി ബന്ധപ്പെട്ട പരിപാടിയിൽ സംസാരിക്കുകയായിരുന്നു അദ്ദേഹം. ശ്രീ ശ്രീ രവിശങ്കറിന്റെ സാന്നിദ്ധ്യത്തിൽ ധ്യാൻ മന്ദിർ ഉൾപ്പെടെ ഉദ്ഘാടനം ചെയ്യുകയും ചെയ്തു.

. ധ്യാൻ മന്ദിർ സേവന മനോഭാവത്തെയും കൂട്ടായ ക്ഷേമത്തെയും പ്രതിഫലിപ്പിക്കുന്നതാണ്. ആഗോളതലത്തിൽ ഇന്ത്യയുടെ സാംസ്‌കാരികവും ആത്മീയവുമായ സ്വത്വം ശക്തിപ്പെടുത്തുന്നതിൽ ബംഗളൂരു നഗരം പ്രധാന പങ്ക് വഹിച്ചിട്ടുണ്ട്. യോഗ, ധ്യാനം, പ്രാണായാമം എന്നിവ രാജ്യത്തിന്റെ സാംസ്‌കാരിക പൈതൃകത്തിന്റെ അവിഭാജ്യ ഘടകങ്ങളാണ്. ലോകമെമ്പാടുമുള്ള ആളുകൾ ഈ ആത്മീയ പൈതൃകത്തിൽ നിന്ന് പ്രചോദനം ഉൾക്കൊണ്ടിട്ടുണ്ട്. രാജ്യത്തെ ഒന്നിച്ചുനിറുത്തുന്ന സത്ത മറ്റുള്ളവർക്കുവേണ്ടി ജീവിക്കുകയെന്ന ചൈതന്യമാണ്.

മനുഷ്യരാശിയുടെ സേവനത്തിലൂടെയാണ് പല ആത്മീയ പ്രസ്ഥാനങ്ങളും ഉയർന്നത്. ആർട്ട് ഓഫ് ലിവിംഗിന്റെ എല്ലാ ശ്രമങ്ങളിലും ഈ സേവന മനോഭാവം വ്യക്തമായി പ്രതിഫലിക്കുന്നു. രാഷ്ട്രനിർമ്മാണത്തിൽ സമൂഹം സജീവമായി പങ്കെടുക്കുമ്പോൾ മാത്രമേ ഏതൊരു സർക്കാരിനും വിജയിക്കാനാകു. ആർട്ട് ഓഫ് ലിവിംഗ് ഫൗണ്ടേഷൻ ഏറ്റെടുത്ത വിവിധ ക്ഷേമ, വികസന പ്രവർത്തനങ്ങളെ മോദി പ്രശംസിച്ചു.