നടപ്പാത കാൽനടയാത്രക്കാരുടെ മൗലികാവകാശം: സുപ്രീംകോടതി

ന്യൂഡൽഹി: നടപ്പാത കാൽനട യാത്രക്കാരുടെ മൗലികാവകാശമെന്ന് സുപ്രീംകോടതി വിധിച്ചു ഭരണഘടനയിലെ അനുച്ഛേദം 19(1)(ഡി) പൗരന്മാർക്ക് സഞ്ചാര സ്വാതന്ത്ര്യം ഉറപ്പുനൽകുന്നു. കൃത്യമായി നിർമ്മിച്ച നടപ്പാതയും അതിലൂടെയുള്ള സഞ്ചാരവും അതിലുൾപ്പെട്ടതാണ്. ജീവിക്കാനുള്ള അവകാശത്തിന്റെ ഭാഗവുമാണ്. ജനങ്ങളുടെ ദൈനംദിന ജീവിതവുമായി ബന്ധപ്പെട്ടതാണിത്. ആ അവകാശത്തെ തടസപ്പെടുത്താൻ വാഹനയാത്രക്കാരെ അനുവദിക്കാൻ കഴിയില്ലെന്ന് ജസ്റ്റിസുമാരായ പി.എസ്. നരസിംഹ, എ.എസ്. ചന്ദുർകർ എന്നിവരടങ്ങിയ ബെ‌ഞ്ച് വ്യക്തമാക്കി. നടപ്പാതകളിൽ കൂടിയാണ് പലരുടെയും വാഹനമോടിക്കൽ. കാൽനടയാത്രക്കാരെ ശല്യമായാണ് ഇത്തരക്കാർ കാണുന്നത്. കാൽനടയായി പോകുന്നവർക്ക് നേരെ കുതിര കയറുകയാണ്. ഈ പ്രവണത അവസാനിപ്പിക്കണം. വാഹനയാത്രക്കാരുടെ സഞ്ചാരത്തേക്കാൾ പ്രാധാന്യം കാൽനടയാത്രക്കാരുടെ നടപ്പാത ഉപയോഗിക്കാനുള്ള അവകാശത്തിനാണ്. വാഹനങ്ങൾ കാരണം നടപ്പാതകൾ ഉപയോഗിക്കാൻ കഴിയാത്തത് നഗര സംസ്‌കാരത്തിന്റെ പ്രശ്‌നമാണെന്നും കോടതി വ്യക്തമാക്കി. പൊതുതാത്പര്യഹ‌ർജി പരിഗണിച്ചാണ് ഇടപെടൽ.

നഷ്‌ടപരിഹാരം ചോദിക്കാം

നടപ്പാത നിർമ്മിച്ച് പരിപാലിക്കാനുള്ള ഉത്തരവാദിത്വം നഗരവികസന അതോറിട്ടികൾ, മുനിസിപ്പൽ കോർപേറഷൻ,മുനിസിപ്പാലിറ്റി,പഞ്ചായത്തുകൾ എന്നിവയ്‌ക്കാണെന്ന് കോടതി ചൂണ്ടിക്കാട്ടി. സുഗമമായ കാൽനടയാത്ര നിഷേധിക്കപ്പെട്ടാലും അപകടം സംഭവിച്ചാലും പൗരന്മാർക്ക് നഷ്‌ടപരിഹാരത്തിന് അർഹതയുണ്ട്. മോട്ടോർ വാഹന നിയമം ഉപയോഗിച്ച് അധികൃതരെ എതിർകക്ഷികളാക്കി കേസ് കൊടുക്കാവുന്നതാണ്.