'സർക്കാരുകൾ വീഴും, പുസ്തകങ്ങൾ നിലനിൽക്കും', സാഹിത്യ അക്കാദമിയുടെ പുസ്തകങ്ങളിൽ സർക്കാർ പരസ്യം, വിമർശിച്ച് സച്ചിദാനന്ദൻ

തിരുവനന്തപുരം: സാഹിത്യ അക്കാദമി പുറത്തിറക്കിയ പുസ്തകങ്ങളിലെ കവറിൽ സർക്കാർ പരസ്യം അച്ചടിച്ചതിൽ വിവാദം. സംഭവത്തിൽ അക്കാദമിയുടെ അദ്ധ്യക്ഷൻ കെ സച്ചിദാനന്ദൻ വിയോജിപ്പ് അറിയിച്ചു. സാഹിത്യ അക്കാദമി പുറത്തിറക്കിയ മുപ്പത് പുസ്തകങ്ങളിലാണ് സർക്കാരിന്റെ രണ്ടാം വാർഷിക പരസ്യം അച്ചടിച്ചത്. ഇതാണ് വിവാദമായത്.

ഈ പരസ്യത്തെ പിന്തുണച്ചുകൊണ്ട് സെക്രട്ടറി സി പി അബൂബക്കർ ഫേസ്ബുക്കിൽ പോസ്റ്റിട്ടിരുന്നു. ഇത് പങ്കുവച്ചാണ് സച്ചിദാനന്ദൻ വിയോജിപ്പ് അറിയിച്ചത്. 'സർക്കാരുകൾ വീഴും, പുസ്തകങ്ങൾ നിലനിൽക്കും.'- എന്നാണ് അദ്ദേഹം ഫേസ്ബുക്കിൽ കുറിച്ചത്. ശാരദക്കുട്ടി അടക്കമുള്ള സാഹിത്യകാരന്മാരും വിയോജിപ്പ് പ്രകടിപ്പിച്ചിട്ടുണ്ട്. പുസ്തകങ്ങളിൽ ഇത്തരത്തിലൊരു എംബ്ലം ചേർത്തക്കാൻ താനാണ് നിർദേശം നൽകിയതെന്നും, ഉത്തരവാദിത്തം ഏറ്റെടുക്കുന്നുവെന്നും അബൂബക്കർ ഫേസ്ബുക്കിൽ കുറിച്ചു.