എംഡിഎംഎ കേസ്: ഭാര്യയ്ക്ക് പിന്നാലെ മൊത്തവിതരണക്കാരനും പിടിയിൽ

വർക്കല: ഭാര്യക്ക് പിന്നാലെ എം.ഡി.എം.എ മൊത്തവിതരണക്കാരനും പിടിയിലായി .വർക്കല മുത്താന സ്വദേശി അൻസർ (31) ആണ് ഡാൻസാഫ് സംഘത്തിന്റെ പിടിയിലായത്. എൻ.ഡി.പി.എസ് കേസുകളിൽ അറസ്റ്റിലായ പ്രതികൾക്ക് എം.ഡി.എം.എ എത്തിച്ചുനൽകിയിരുന്നത് അൻസറാണെന്നു പൊലീസ് പറഞ്ഞു. കല്ലമ്പലം കേസിൽ റിമാൻഡിലുള്ള തസ്ലീന,മുഹമ്മദ് ഷാൻ,അയിരൂർ കേസിൽ അറസ്റ്റിലായ സതീഷ് എന്നിവർക്ക് വിൽപനയ്ക്കായി വലിയ അളവിൽ എം.ഡി.എം.എ എത്തിച്ചിരുന്നത് അൻസറാണെന്ന് കണ്ടെത്തിയതായി പൊലീസ് അറിയിച്ചു.

മൊബൈൽ ഫോൺ സ്വിച്ച് ഓഫ് ചെയ്ത് ഒളിവിലായിരുന്ന അൻസർ നാട്ടിലെത്തിയെന്ന രഹസ്യവിവരത്തെ തുടർന്ന് നടത്തിയ നിരീക്ഷണത്തിലാണ് പിടിയിലായത്. ജയിലിലുള്ള ഭാര്യ തസ്ലീനയെ സന്ദർശിക്കാൻ വാഹനത്തിൽ പോകുന്നതിനിടെ ഇയാളെ കസ്റ്റഡിയിലെടുക്കുകയായിരുന്നു.