എം.ഡി.എം.എ കേസിൽ ഡോക്ടർ പിടിയിൽ

കൽപ്പറ്റ: വയനാട് ലക്കിടിയിൽ 8.520 ഗ്രാം എം.ഡി.എം.എ പിടികൂടിയ കേസിൽ മൂന്നാം പ്രതിയായ ഡോക്ടറും പിടിയിൽ. കോഴിക്കോട്ടെ സ്വകാര്യ സൂപ്പർ സ്‌പെഷാലിറ്റി ആശുപത്രിയിലെ എമർജൻസി ക്രിട്ടിക്കൽ കെയർ വിഭാഗം മേധാവി മലപ്പുറം മൊറയൂർ സ്വദേശി ലൗഡെൽ വീട്ടിൽ ഡോ. കെ. എൻ . മുഹമ്മദ് ഫാബിൻ (41) ആണ് അറസ്റ്റിലായത്. കേസിൽ തമിഴ്നാട് സ്വദേശികളായ നൗഫൽ , മുഹമ്മദ് നസീബ് എന്നിവരെ ഒക്ടോബർ 22ന് വൈത്തിരി പൊലീസ് അറസ്റ്റ് ചെയ്തിരുന്നു .
ഡോക്ടറും ഒന്നാം പ്രതിയായ നൗഫലും തമ്മിലുള്ള ഫോൺ കോളുകളും വാട്സ് ആപ്പ് ചാറ്റുകളും പണമിടപാട് വിവരങ്ങളും പൊലീസ് കണ്ടെത്തി. നർക്കോട്ടിക് ഡിവൈ.എസ്.പി മനോഹരൻ തച്ചമ്പത്തിന്റെ നേതൃത്വത്തിലുള്ള ജില്ലാ ലഹരി വിരുദ്ധ സ്‌ക്വാഡും വൈത്തിരി സർക്കിൾ ഇൻസ്‌പെക്ടർ പി.ജി . രാംജിത്തിന്റെ നേതൃത്വത്തിലുള്ള പൊലീസ് സംഘവും ചേർന്ന് നടത്തിയ അന്വേഷണത്തിലാണ് ഡോക്ടറെ കുറിച്ച് സൂചന ലഭിച്ചത് . കഴിഞ്ഞ ദിവസം കോഴിക്കോട് മണാശേരിയിലെ വാടക വീടിന് സമീപത്തു നിന്ന് വൈത്തിരി പൊലീസ് കസ്റ്റഡിയിൽ എടുക്കുകയായിരുന്നു. കൽപ്പറ്റ ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ ഹാജരാക്കിയ പ്രതിയെ 14 ദിവസത്തേയ്ക്ക് റിമാൻഡ് ചെയ്ത് വൈത്തിരി സബ് ജയിലിലേക്ക് അയച്ചു.