പെൺകുട്ടിയെ ആദ്യം എത്തിച്ചത് ആയുർ കേരള റിസോർട്ടിൽ,​ കേസിൽ നിർണായകമായത് ആധാർ കാർഡ്

തിരുവനന്തപുരം : ആന്ധ്ര സ്വദേശിനിയായ പതിനാറുകാരി പെൺകുട്ടിയെ ഇളയമ്മയും ഭർത്താവും ആദ്യം ആയുർ കേരള റിസോർട്ടിൽ എത്തിച്ചാണ് ലൈംഗിക ചൂഷണത്തിന് ഇരയാക്കിയത്. കുട്ടിക്കൊപ്പം ഇളയമ്മയും ഭർത്താവും സ്പായിൽ താമസിക്കുകയായിരുന്നു. ഇവിടെ നിന്നു പിണങ്ങിയതോടെ പെൺകുട്ടിയുമായി ഡ്രീംസ് സ്പായിൽ എത്തി. ഇതിനിടെ, ആദ്യത്തെ സ്പായിൽ വച്ച് പരിചയപ്പെട്ട നെയ്യാർ ഡാം സ്വദേശിയായ യുവാവിനൊപ്പം കഴിഞ്ഞ മാസം 19 ന് പെൺകുട്ടി ഒളിച്ചോടി. തുടർന്ന് ഇളയമ്മ നൽകിയ പരാതിയിൽ പൊലീസ് പെൺകുട്ടിയെ കണ്ടെത്തി കോടതി മുഖാന്തരം ഇളയമ്മയോടൊപ്പം വിട്ടു.

ഇളയമ്മയുടെ കൈവശമുണ്ടായിരുന്ന ഫോണിൽ നിന്നു പെൺകുട്ടിയുടെ രണ്ട് ആധാർ കാർഡുകൾ കണ്ടെത്തിയതാണ് കേസിൽ നിർണായകമായത്. ഒരു കാർഡിൽ 20 വയസും മറ്റൊന്നിൽ 16 വയസുമാണ് രേഖപ്പെടുത്തിയിരുന്നത്. ഇതോടെ പൊലീസ് പെൺകുട്ടിയെ രക്ഷിതാക്കളുടെ സംരക്ഷണയിൽ നിന്ന് ഷെൽറ്റർ ഹോമിലേക്ക് മാറ്റി. പരിഭാഷകന്റെസഹായത്തോടെ നടത്തിയ കൗൺസലിംഗിലാണ് പീഡനം കുട്ടി വെളിപ്പെടുത്തിയത്. ഇതോടെ ഇളയമ്മയും ഭർത്താവും ഒളിവിൽ പോയി. പെൺകുട്ടി പഠിച്ചിരുന്ന സ്‌കൂളുകളുമായി ബന്ധപ്പെട്ട് പെൺകുട്ടിക്ക് പ്രായപൂർത്തിയായിട്ടില്ലന്ന് പൊലീസ് ഉറപ്പുവരുത്തി. അതേസമയം കോവളത്തെ സ്പായിൽ ഹെൽത്ത് ഇൻസ്‌പെക്ടർക്ക് ബിനാമി ഇടപാട് ഉണ്ടെന്ന് കോവളം പൊലീസ് പറഞ്ഞു. ഇയാളുടെ ഫോണിലേക്ക് പ്രതികൾ നിരന്തരം ബന്ധപ്പെട്ട രേഖകൾ ലഭിച്ചിട്ടുണ്ടെന്നും പൊലീസ് വ്യക്തമാക്കി.

.