കപ്പൽ നഷ്‌ടപരിഹാരം : ഹൈക്കോടതിയിലെ നടപടി വിലക്കി

ന്യൂഡൽഹി: എം.എസ്.സി എൽസ 3 കപ്പൽ കേരള തീരത്ത് മുങ്ങിയതുമായി ബന്ധപ്പെട്ട് ഹൈക്കോടതിയിലുള്ള നഷ്‌ടപരിഹാരക്കേസുകൾ നവംബർ 13 വരെ ഹൈക്കോടതി പരിഗണിക്കരുതെന്ന് ജസ്റ്റിസ് കെ.വി.വിശ്വനാഥൻ,​ അരുൺ പല്ലി എന്നിവരടങ്ങിയ ബെഞ്ച് നിർദ്ദേശിച്ചു.

ബാദ്ധ്യതയിൽ ഇളവു കിട്ടാൻ ലൈബീരിയൻ കപ്പൽ കമ്പനി സമർപ്പിച്ച ഹർജി നിലനിൽക്കുമെന്ന് ഹൈക്കോടതി നിലപാടെടുത്തിരുന്നു. ഇതിനെതിരെ മംഗലത്ത് കാഷ്യൂസ്,​ സാൻസ് ക്യാഷൂ ഇറക്കുമതി കമ്പനികൾ സമർപ്പിച്ച ഹർജിയിലാണിത്. ഇവർ ഓർഡർ ചെയ്‌തിരുന്ന വൻ കശുഅണ്ടി ശേഖരം കപ്പലിനകത്തുണ്ടായിരുന്നു. ഹൈക്കോടതിയിലെ നടപടികളിൽ തത്‌സ്ഥിതി തുടരാൻ നിർദ്ദേശിച്ച സുപ്രീംകോടതി, കപ്പൽ കമ്പനി അടക്കം എതിർകക്ഷികൾക്ക് നോട്ടീസ് അയയ്ക്കാനും ഉത്തരവിട്ടു.