സംസ്ഥാന സ്‌കൂൾ കായികമേള കോഴിക്കോട് ഒരുങ്ങി

കോഴിക്കോട്: സംസ്ഥാന സ്‌കൂൾ കായികമേളയ്ക്ക് ഒരുങ്ങി കോഴിക്കോട്. മുക്കം എൻ.ഐ.ടി ഗ്രൗണ്ടിലെ മുഖ്യ വേദിയിൽ 25ന് വൈകിട്ട് നാലിന് മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും. കായികമേളയുടെ നടത്തിപ്പ് സുഗമമാക്കാൻ വിദ്യാഭ്യാസ മന്ത്രി അഡ്വ. എൻ. ഷംസുദ്ദീന്റെ നേതൃത്വത്തിൽ എൻ.ഐ.ടി ക്യാമ്പസിലെ സ്വാഗതസംഘം ഓഫീസിൽ ഇന്നലെ അവലോകന യോഗം ചേർന്നു. അന്താരാഷ്ട്ര നിലവാരത്തിൽ നവീകരിച്ച സിന്തറ്റിക് ട്രാക്കും ഗ്രൗണ്ടുമാണ് കായികമേളയുടെ പ്രധാന വേദിയാകുന്നത്. തിരുവനന്തപുരത്തു നിന്നുള്ള ട്രോഫി പ്രയാണവും കാസർകോട്ടു നിന്നുള്ള ദീപശിഖാ പ്രയാണവും 25ന് രാവിലെ കോഴിക്കോട് ബീച്ചിൽ സംഗമിക്കും. തുടർന്ന് നഗരപ്രദക്ഷിണം നടത്തി മാർച്ച് പാസ്റ്റോടെ എൻ.ഐ.ടി.യിൽ എത്തിച്ചേരും.

ഒക്ടോബർ 31ന് നടക്കുന്ന സമാപന സമ്മേളനത്തിൽ ആഭ്യന്തരമന്ത്രി രമേശ് ചെന്നിത്തലയാണ് മുഖ്യാതിഥി. മുഴുവൻ മന്ത്രിമാരും പ്രതിപക്ഷ നേതാവ് പിണറായി വിജയൻ ഉൾപ്പെടെ വിശിഷ്ട വ്യക്തികളും ഉദ്ഘാടന - സമാപന പരിപാടികളിലായി പങ്കെടുക്കും.

കായികമേളയ്ക്കായി ഒരുക്കിയ മെഡിക്കൽ, ട്രാൻസ്‌പോർട്ട് കമ്മിറ്റി ആപ്പ് ലോഞ്ചിംഗ്, സുവനീർ കവർ പ്രകാശനം, മീഡിയ കോൾ സെന്റർ ആക്ടിവേഷൻ എന്നിവ അവലോകന യോഗത്തിൽ മന്ത്രി നിർവഹിച്ചു. മേളയുടെ സംഘാടനത്തിനായി രൂപീകരിച്ച 17 സബ് കമ്മിറ്റികളും പ്രവർത്തനങ്ങൾ മുൻകൂട്ടി ചിട്ടപ്പെടുത്തി പൂർണ്ണ ജാഗ്രത പാലിക്കണമെന്ന് മന്ത്രി നിർദ്ദേശം നൽകി. യോഗത്തിൽ സംഘാടകസമിതി ചെയർമാൻ എം.എ. റസാഖ് എം.എൽ.എ. അദ്ധ്യക്ഷനായി.