313ൽ ഒരു തോൽവി; ഒടുവിൽ  നൂറുമേനി തിരിച്ചുപിടിച്ച് വിദ്യാലയം

വൈപ്പിൻ: വൈപ്പിൻകരയിൽ നിന്ന് ഏറ്റവും കൂടുതൽ വിദ്യാർത്ഥികൾ എസ്.എസ്.എൽ.സി പരീക്ഷ എഴുതിയ എടവനക്കാട് എസ്.ഡി.പി.വൈ കെ.പി.എം ഹൈസ്‌കൂളിലെ ഒരു കുട്ടിയുടെ തോൽവി വിദ്യാലയത്തിന് ഒരു ആഘാതമായിരുന്നു. എന്നാൽ താൻ പരീക്ഷ നന്നായി എഴുതിയിട്ടുണ്ടെന്ന വിദ്യാർത്ഥിയുടെ ആത്മവിശ്വാസത്തോടൊപ്പമായിരുന്നു അദ്ധ്യാപകർ. ഇതേ തുടർന്ന് പുനർ മൂല്യനിർണയത്തിന് അപേക്ഷ നൽകി. കഴിഞ്ഞ ദിവസം പുനഃ പരിശോധന ഫലം വന്നപ്പോൾ ആ വിദ്യാർത്ഥിയും വിജയിച്ചു. ഇതോടെ ഒരു കുട്ടിയുടെ തോൽവിയിൽ വിഷമിച്ചിരുന്ന വിദ്യാലയം നൂറ് മേനി നേട്ടം തിരിച്ചുപിടിച്ചതിന്റെ ആഹ്‌ളാദത്തിൽ പി.ടി.എയുടെ നേതൃത്വത്തിൽ അനുമോദനയോഗം സംഘടിപ്പിച്ചു. പി.ടി.എ പ്രസിഡന്റ് ഷിജോയ് സേവിയർ, വൈസ് പ്രസിഡന്റ് എം.പി. പ്രശോഭ് എന്നിവർ ചേർന്ന് പ്രധാനാദ്ധ്യാപിക സി. രത്‌നകലയ്ക്ക് ഉപഹാരം നൽകി.