അഞ്ച് വർഷത്തിനിനിടെ 2,310 വന്യജീവി സംഘർഷം

മലപ്പുറം: അഞ്ച് വർഷത്തിനിടെ ജില്ലയിൽ രജിസ്റ്റർ ചെയ്തത് 2,310 മനുഷ്യ- വന്യജീവി സംഘർഷങ്ങൾ. 2020 മുതൽ 2024 വരെയുള്ള കാലയളവിൽ 45 പേർക്ക് ജീവൻ നഷ്ടപ്പെട്ടിട്ടുണ്ട്. 98 പേർക്ക് പരിക്കേറ്റു. ഗുരുതര പരിക്കേറ്റ് ഏറെക്കാലം ചികിത്സയിൽ കഴിഞ്ഞവർ ഉൾപ്പെടെയുണ്ട്. നിലമ്പൂർ നോർത്ത്, സൗത്ത് ഫോറസ്റ്റ് ഡിവിഷനുകൾക്ക് കീഴിലാണ് 70 ശതമാനത്തോളം വന്യജീവി ആക്രമണങ്ങളും റിപ്പോർട്ട് ചെയ്യുന്നത് എന്നാണ് വനം വകുപ്പിന്റെ കണക്കുകൾ തെളിയിക്കുന്നത്. വനത്തിന്റെ സ്വാഭികത നിലനിറുത്തുന്നതിനായി ആവാസ വ്യവസ്ഥയ്ക്ക് ദോഷം ചെയ്യുന്ന യൂക്കാലിപ്സ്, അക്കേഷ്യ തുടങ്ങിയ വിദേശയിനം ഏക വിളത്തോട്ടങ്ങളും സെന്ന, വാറ്റിൽ പോലുള്ള അധിനിവേശ സസ്യങ്ങളും ഘട്ടംഘട്ടമായി നീക്കി നാടൻ ഇനത്തിൽപ്പെട്ട മരങ്ങളും ഫലവൃക്ഷങ്ങളും നട്ടുപിടിപ്പിക്കുന്ന പദ്ധതി പുരോഗമിക്കുന്നുണ്ട്.

പാമ്പ് തന്നെ വില്ലൻ

• മരണങ്ങളിൽ 70 ശതമാനത്തോളം വനത്തിന് പുറത്തുവച്ച് പാമ്പ് കടിയേറ്റുള്ള മരണങ്ങളാണ്. വനത്തിന് പുറത്തുവച്ചുള്ള പാമ്പ്, തേനീച്ച, കടന്നൽ എന്നിവ മൂലമുള്ള അപകടങ്ങളെയൊക്കെ വന്യമൃഗ സംഘർഷം എന്ന പട്ടികയിലാണ് ഉൾപ്പെടുത്തുന്നത്. ഇതാണ് മരണ നിരക്ക് കൂടുതലായി രേഖപ്പെടുത്താൻ കാരണമെന്നാണ് വനം വകുപ്പ് അധികൃതർ പറയുന്നത്.
• പാമ്പ് കടിയേറ്റുള്ള മരണങ്ങളിൽ ഭൂരിഭാഗവും ജനവാസ മേഖലയിൽ വച്ച് ഉണ്ടായവയാണ്. ശേഷിക്കുന്ന മരണങ്ങളിൽ 20 ശതമാനമാണ് കാട്ടാന ആക്രമണം മൂലം രേഖപ്പെടുത്തുന്നത്.
• വനത്തോട് ചേർന്നുള്ള ജില്ലയിലെ മലയോര മേഖലകളിൽ കടുവയുടെ സാന്നിദ്ധ്യം സ്ഥിരീകരിച്ചിട്ടുണ്ടെങ്കിലും ഇതുവരെ ആക്രമണങ്ങളോ മരണമോ റിപ്പോർട്ട് ചെയ്തിട്ടില്ല.

വർഷം.......... വന്യജീവി സംഘർഷം......... പരിക്ക് ............... മരണം
2020 ....................... 494 ............................ 15 ........................ 9
2021 ....................... 480 ........................... 16 ......................... 8
2022 ....................... 457 ............................ 14 ........................ 9
2023 ...................... 398 ............................. 35 ........................ 8
2024 ...................... 481 ............................. 18 .........................11

ആകെ.................. 2,310 ........................... 98 ....................... 45

ഫലവൃക്ഷങ്ങളും നാടൻ മരങ്ങളും നട്ടുപിടിപ്പിക്കുന്നതിലൂടെ വനത്തിനുള്ളിൽ തന്നെ ഭക്ഷണ ലഭ്യത കൂടി ഉറപ്പുവരുത്താൻ സാധിക്കും. നാട്ടിലേക്ക് ആന ഉൾപ്പെടെ ഉള്ളവ ഇറങ്ങുന്നത് കുറയ്ക്കാനാവും.

വനം വകുപ്പ് അധികൃതർ