പുതിയ ഇനം മത്സ്യത്തെ കണ്ടെത്തി; 'ടെട്രോനാർസി രാമനമൂർത്തി': അറബിക്കടലിലെ ഷോക്കടിപ്പിക്കും താരം

ബംഗളൂരു: കണ്ടാൽ പാവമെന്ന് തോന്നുമെങ്കിലും തൊട്ടാൽ 220 വോൾട്ട് വൈദ്യുതി പ്രവഹിപ്പിക്കുന്ന വീരൻ. ഭൂമിശാസ്ത്ര മന്ത്രാലയം 'ഡീപ് ഓഷ്യൻ മിഷൻ" പദ്ധതിയുടെ ഭാഗമായ ഗവേഷണത്തിൽ തെക്കുകിഴക്കൻ അറബിക്കടലിൽ കണ്ടെത്തിയ ഇലക്‌ട്രിക് റേ മത്സ്യമാണിത്. ഇവയ്‌ക്ക് 'ടെട്രേുനാർസി രാമനമൂർത്തി" എന്നു പേരിട്ടതായി സുവോളജിക്കൽ സർവേ ഒഫ് ഇന്ത്യ അറിയിച്ചു.

വൈദ്യുതി പ്രവഹിപ്പിക്കാൻ ശേഷിയുള്ള 'ടെട്രോനാർസി" ജെനുസിൽപ്പെട്ട മീനുകളെ ആദ്യമായാണ് ഉപഭൂഖണ്ഡത്തിലെ കടലിൽ കണ്ടെത്തുന്നത്. ഉരുണ്ട് കട്ടിയുള്ള ശരീരവും ചെറിയ വാലുമുള്ള കുഞ്ഞൻ മത്സ്യങ്ങളാണിവ. ഇന്ത്യയുടെ ആഴക്കടൽ ആവാസവ്യവസ്ഥകളിലെ, ഇതുവരെ അറിയപ്പെടാത്ത ജൈവവൈവിദ്ധ്യത്തിലേക്ക് വെളിച്ചം വീശുന്നതാണ് കണ്ടെത്തലെന്ന് സുവോളിക്കൽ സർവേ അധികൃതർ അറിയിച്ചു. അന്താരാഷ്ട്ര ടാക്‌സോണമി (വർഗീകരണ ശാസ്ത്ര) ജേണലായ 'സൂടാക്സ" യിൽ ഈ കണ്ടെത്തലിനെക്കുറിച്ച് പ്രസിദ്ധീകരിച്ചിട്ടുണ്ട്.

220 വോൾട്ട് വരെ വൈദ്യുതി

 'മാന്റ റേ" മത്സ്യങ്ങളെപ്പോലെ തരുണാസ്ഥികൾകൊണ്ട് നിർമ്മിച്ച ശരീരഘടന. വീതിയുള്ള ശരീരം.

 കടലിന്റെ അടിത്തട്ടിൽ മണലോ ചെളിയോ നിറഞ്ഞ ഭാഗങ്ങളിൽ പതുക്കെ സഞ്ചരിക്കും

 ഇരകളെ തളർത്താനും ശത്രുക്കളിൽ നിന്ന് രക്ഷനേടാനും ഇവയ്ക്ക് 8 മുതൽ 220 വോൾട്ട് വരെ വൈദ്യുതി ഉത്പാദിപ്പിക്കാനാകും

 നീലകലർന്ന കറുപ്പും കടും തവിട്ട് നിറമുള്ളവയുമുണ്ട്

 വൈദ്യുത രശ്മികൾക്ക് കടക്കാൻ പാകത്തിൽ വൃത്താകൃതിയിലുള്ളതും കട്ടിയുള്ളതുമായ ശരീരം.ചെറിയ വാലുകൾ.

ഭൗമ ശാസ്ത്ര മന്ത്രാലയത്തിലെ ഡീപ് ഓഷ്യൻ മിഷൻ ഡയറക്ടർ ഡോ. എം. വി. രാമനമൂർത്തിയോടുള്ള ബഹുമാനാർത്ഥമാണ് ഈ ഇനത്തിന് ടെട്രോനാർസ് രാമനമൂർത്തി എന്ന് പേരിട്ടത്