
ചെന്നൈ: നോർവെ ചെസ് ടൂർണമെന്റിൽ ചാമ്പ്യനാകുന്ന ആദ്യ ഇന്ത്യൻ താരം ആർ. പ്രഗ്നാനന്ദയ്ക്ക് തമിഴ്നാടിന്റെ ആദരമായി 50 ലക്ഷം രൂപ നൽകി മുഖ്യമന്ത്രി വിജയ്. ചെന്നൈയിൽ തരിച്ചെത്തിയ പ്രഗ്നാനന്ദ എയർപോർട്ടിൽ നിന്ന് നേരെ മുഖ്യമന്ത്രിയുടെ ഓഫീസിലെത്തിയാണ് വിജയ്യുമായി കൂടിക്കാഴ്ച നടത്തിയത്. പ്രഗ്ഗിന്റെ മാതാപിതാക്കളും തമിഴ്നാട് കായിക മന്ത്രി ആധവ് അർജുനയും കൂടിക്കാഴ്ചയിൽ പങ്കെടുത്തു.
കൂടിക്കാഴ്ചയ്ക്കിടെ ചെസ് ബോർഡിന് മുന്നിൽ ഒരു കൈനോക്കിയാലോയെന്ന വിജയ്യുടെ സ്നേഹത്തോടെയുള്ള വെല്ലുവിളി പ്രഗ്ഗ് സ്വീകരിച്ചതോടെ മുഖ്യമന്ത്രിയുടെ ഓഫീസ് മനോഹരമായൊരു സൗഹൃദ ചെസ് മത്സരത്തിന് വേദിയായി. ഏതാനും നീക്കങ്ങൾ കൊണ്ട് തന്നെ മുഖ്യമന്ത്രിയ്ക്ക് പ്രഗ്ഗിനോട് പരാജയം സമ്മതിക്കേണ്ടി വന്നു. പരാജയപ്പെട്ടെങ്കിലും പൊട്ടിച്ചിരിച്ചും കൈയടിച്ചും വിജയ് പ്രഗ്ഗിനെ അഭിനന്ദിച്ചു. വിജയ്യും പ്രഗ്ഗും ചെസ് കളിക്കുന്ന വീഡിയോ നിമിഷ നേരം കൊണ്ട് സാമൂഹ്യമാദ്ധ്യമങ്ങളിൽ വൈറലായി. ഓസ്ലോയിൽ നടന്ന നോർവേ ചെസ് ടൂർണമെന്റിന്റെ അവസാന റൗണ്ടിൽ ജർമനിയുടെ വിൻസെന്റ് കീമറെ പരാജയപ്പെടുത്തി 18 പോയിന്റുകൾ നേടിയായാണ് 20കാരനായ ഇന്ത്യൻ ഗ്രാൻഡ്മാസ്റ്റർ പ്രഗ്ഗ് ചരിത്ര നേട്ടത്തിലെത്തിയത്.
|
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |