വിമാനത്തിൽ മുഖ്യമന്ത്രിയെ വധിക്കാൻ ശ്രമിച്ചു: കോടിയേരി

തിരുവനന്തപുരം: വിമാനത്തിൽ മുഖ്യമന്ത്രിയെ ലക്ഷ്യമാക്കി നടത്തിയത് വധശ്രമമായിരുന്നുവെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ. ഇ.പി. ജയരാജന്റെയും മറ്റും സന്ദർഭോചിതമായ ഇടപെടൽ കൊണ്ടാണ് അക്രമികൾക്ക് പിണറായി വിജയനെ തൊടാനാവാത്തതെന്ന് സി.പി.എം മുഖപത്രത്തിലെഴുതിയ ലേഖനത്തിൽ കോടിയേരി പറഞ്ഞു.

2021ലെ നിയമസഭാതിരഞ്ഞെടുപ്പിലും അതിനുമുമ്പ് തദ്ദേശഭരണ തിരഞ്ഞെടുപ്പിലും രണ്ട് പ്രതിപക്ഷ മുന്നണിക്കാരും എൽ.ഡി.എഫിനും മുഖ്യമന്ത്രിക്കും കുടുംബത്തിനുമെതിരെ പ്രചരിപ്പിച്ചതും ജനങ്ങൾ തള്ളിയതുമായ നുണകളാണ് വീണ്ടും അവതരിപ്പിച്ച് നാട്ടിൽ കലാപമുണ്ടാക്കാൻ നോക്കുന്നത്. ഇത് തിരിച്ചറിയാനുള്ള വിവേകം കേരള ജനതയ്ക്കുണ്ട്.

മുഖ്യമന്ത്രിയെ വിമാനത്തിൽ ആക്രമിക്കാൻ ശ്രമിക്കുന്നത് പ്രതിഷേധവും പ്രതിപക്ഷ നേതാവിന്റെ വീട്ടിൽ മൂന്ന് സി.പി.എം പ്രവർത്തകർ കടന്നത് അതിക്രമവുമെന്ന നിലയിലാണ് മാദ്ധ്യമ വ്യാഖ്യാനമെന്നും കോടിയേരി പറഞ്ഞു.