വിശപ്പിന്റെ കരിന്തിരി കണ്ണുകളും കണ്ണടയ്ക്കുന്ന ഭരണകൂടങ്ങളും

 ആധുനികതയുടെയും പുരോഗതിയുടെയും തിളക്കമുള്ള ചില്ലുകൊട്ടാരങ്ങൾക്ക് മീതെ വീണ കരിനിഴലായിരുന്നു ഹരിപ്പാട് നിന്ന് ഉയർന്ന ആ കരച്ചിൽ. രണ്ടര വയസ് മാത്രം പ്രായമുള്ള ഒരു കുഞ്ഞ്, പോഷകാഹാരക്കുറവും പരിചരണമില്ലായ്മയും മൂലം മരണത്തിന് കീഴടങ്ങിയപ്പോൾ ഉലഞ്ഞുപോയത് ഏതാനും ചില മനുഷ്യരുടെ മനസ് മാത്രമല്ല, നമ്മൾ കെട്ടിയുയർത്തിയ സാമൂഹിക ബോധത്തിന്റെ അടിത്തറ കൂടിയാണ്.

കേരളം ആധുനിക സാമൂഹിക സൂചകങ്ങളിലും ആരോഗ്യ രംഗത്തും വികസിത രാജ്യങ്ങളോട് കിടപിടിക്കുന്നു എന്ന് നാം അഭിമാനിക്കുന്നു.

പക്ഷേ നമ്മുടെ നാട്ടിൽ നിന്ന് ഇടയ്ക്കിടെ പുറത്തുവരുന്ന വാർത്തകൾ ഈ അവകാശവാദങ്ങളുടെ പൊള്ളത്തരം വെളിച്ചത്തുകൊണ്ടുവരുന്നു. ആലപ്പുഴ ജില്ലയിലെ ഹരിപ്പാട് രണ്ടര വയസുകാരൻ പോഷകാഹാരക്കുറവ് മൂലം ദാരുണമായി മരണപ്പെട്ട സംഭവം മനഃസാക്ഷിയെ ഒന്നടങ്കം ഞെട്ടിച്ചു. പരിപാലനമില്ലാതെ പോഷകാഹാരക്കുറവ് മൂലം ഒരു കുഞ്ഞ് മരണപ്പെടുന്നത് ഒരു പുരോഗമന സമൂഹത്തിന് ഒരിക്കലും ചേരുന്നതല്ല.

ഈ ദുരന്തത്തിന്റെ പശ്ചാത്തലത്തിൽ, കേരളത്തിൽ ആവർത്തിക്കപ്പെടുന്ന പട്ടിണി മരണങ്ങളെ കുറിച്ചും, കുട്ടികളുടെ സംരക്ഷണത്തിൽ മാതാപിതാക്കളും ശിശുസംരക്ഷണ വകുപ്പും വരുത്തിയ ഗുരുതരമായ വീഴ്ചകളെ കുറിച്ചും സമഗ്രമായി പരിശോധിക്കേണ്ടതാണ്. നൂറുശതമാനം സാക്ഷരതയും മികച്ച ആരോഗ്യ സംവിധാനങ്ങളും ഉണ്ടെന്ന് അവകാശപ്പെടുന്ന കേരളത്തിൽ പട്ടിണി മരണങ്ങളോ പോഷകാഹാരക്കുറവ് മൂലമുള്ള മരണമോ നടക്കുന്നു എന്നത് അവിശ്വസനീയമായി തോന്നാം.

കഴിഞ്ഞകാലങ്ങളിൽ അട്ടപ്പാടിയിലും കേരളത്തിന്റെ മറ്റ് വിവിധ ഭാഗങ്ങളിലും ഇത്തരം ദാരുണ സംഭവങ്ങൾ ആവർത്തിക്കപ്പെട്ടു. സമ്പൂർണസാക്ഷരതയും ഭക്ഷ്യസുരക്ഷാ നിയമങ്ങളും നിലനിൽക്കുമ്പോഴും സമൂഹത്തിലെ പാർശ്വവത്കരിക്കപ്പെട്ട വിഭാഗങ്ങൾക്കിടയിൽ വിശപ്പും ദാരിദ്ര്യവും ഇന്നും നിലനിൽക്കുന്നു എന്നതിന്റെ തെളിവാണ് ഈ സംഭവം. പോഷകാഹാരക്കുറവ് എന്നാൽ കേവലം ഭക്ഷണം ലഭിക്കാത്ത അവസ്ഥ മാത്രമല്ല . ശരീരത്തിന് വളർച്ചയ്ക്കും ആരോഗ്യത്തിനും ആവശ്യമായ പ്രോട്ടീൻ, വിറ്റാമിനുകൾ, ധാതുക്കൾ എന്നിവയുടെ അഭാവം കുട്ടികളിൽ മാരക ആരോഗ്യപ്രശ്നങ്ങൾ സൃഷ്ടിക്കുന്നു. അട്ടപ്പാടി ഉൾപ്പെടെയുള്ള ആദിവാസി ഊരുകളിൽ നവജാത ശിശുക്കളുടെ മരണങ്ങളും പോഷകാഹാരക്കുറവും വാർത്തകളിൽ ഇടംപിടിക്കാറുണ്ട്.

 സാമൂഹിക ചുറ്റുപാടുകളും താളംതെറ്റിയ ക്രമങ്ങളും

എന്നാൽ ഇപ്പോൾ മുഖ്യധാരാ സമൂഹത്തിലും, അതായത് സാമ്പത്തികമായി പിന്നാക്കം നിൽക്കുന്നതോ കുടുംബപരമായ പശ്ചാത്തലങ്ങളാൽ ഒറ്റപ്പെടുന്നതോ ആയ ഇടങ്ങളിൽ ദാരിദ്ര്യം കടന്നുവരുന്നു. കുട്ടികളുടെ സംരക്ഷണത്തിൽ മാതാപിതാക്കൾക്കാണ് വലിയ ഉത്തരവാദിത്വമുള്ളത്. എന്നാൽ ഹരിപ്പാട് ഉൾപ്പെടെയുള്ള സംഭവങ്ങൾ പരിശോധിക്കുമ്പോൾ, മാതാപിതാക്കളുടെ ഭാഗത്തുനിന്നും വീഴ്ചകൾ സംഭവിച്ചിട്ടുണ്ടെന്ന് കാണാം. ഇത് കേവലം അവരുടെ അശ്രദ്ധ കൊണ്ടുമാത്രമല്ല, മറിച്ച് പലതരം സാമൂഹിക-സാമ്പത്തിക സാഹചര്യങ്ങളുടെ ഫലവും കൂടിയാണ്. ദാരിദ്ര്യം മൂലം കുടുംബത്തിൽ കുട്ടികൾക്ക് ആവശ്യമായ ഭക്ഷണമെത്തിക്കാൻ കഴിയാത്ത സാഹചര്യമുണ്ടാകാം. ദമ്പതികൾ തമ്മിലുള്ള പ്രശ്നങ്ങൾ, കുടുംബത്തിലെ തകർച്ച എന്നിവ കുട്ടികളുടെ സംരക്ഷണത്തെ സാരമായി ബാധിക്കുന്നു. പല മാതാപിതാക്കൾക്കും കുട്ടികൾക്ക് നൽകേണ്ട ആരോഗ്യകരമായ ആഹാരത്തെക്കുറിച്ചും, കൃത്യസമയത്ത് നൽകേണ്ട പ്രതിരോധ കുത്തിവയ്പ്പുകളെക്കുറിച്ചും വ്യക്തമായ ധാരണയില്ല. കുട്ടിയുടെ ശാരീരിക വളർച്ചയിലുണ്ടാകുന്ന വ്യത്യാസം സമയബന്ധിതമായി തിരിച്ചറിയാൻ കഴിയാതെ പോകുന്നത് പലപ്പോഴും വലിയ ദുരന്തങ്ങളിൽ കലാശിക്കുന്നു. മാതാപിതാക്കളുടെ കടുത്ത മാനസിക സംഘർഷങ്ങളും വിഷാദാവസ്ഥയും കുട്ടികളെ വേണ്ടവിധം പരിപാലിക്കുന്നതിൽ നിന്നും അവരെ പിന്തിരിപ്പിക്കുന്നു.

 ഭരണസംവിധാനങ്ങളിലെ ഏകോപനമില്ലായ്മ

മാതാപിതാക്കൾക്ക് പുറമെ, കുട്ടികളുടെ സംരക്ഷണം ഉറപ്പാക്കേണ്ട പൂർണഉത്തരവാദിത്വം സർക്കാരിനും ബന്ധപ്പെട്ട വകുപ്പുകൾക്കുമാണ്. വനിതാ ശിശുവികസന വകുപ്പ്, ആരോഗ്യ വകുപ്പ്, അങ്കണവാടികൾ, ആശാ വർക്കർമാർ എന്നിവരടങ്ങുന്ന വലിയൊരു സംവിധാനം കേരളത്തിലുണ്ട്. എന്നിട്ടും ഇത്തരം സംഭവങ്ങൾ ആവർത്തിക്കപ്പെടുന്നു എന്നത് സർക്കാർ സംവിധാനങ്ങളുടെ ഏകോപനമില്ലായ്മയെയും ജാഗ്രതക്കുറവിനെയും എടുത്തുകാട്ടുന്നു. പ്രാദേശിക തലത്തിൽ കുട്ടികളുടെ ആരോഗ്യം നിരീക്ഷിക്കേണ്ട ചുമതല അങ്കണവാടി വർക്കർമാർക്കും ആശാ വർക്കർമാർക്കുമാണ്. എന്നാൽ പല പ്രദേശങ്ങളിലും ഈ നിരീക്ഷണം കാര്യക്ഷമമായി നടക്കുന്നില്ല. ഒരു കുട്ടിയുടെ വളർച്ച മുരടിക്കുന്നുവോ എന്ന് കണ്ടെത്താൻ സംവിധാനങ്ങൾ പരാജയപ്പെടുന്നു. കുട്ടികൾക്കും അമ്മമാർക്കുമായി നിരവധി പോഷകാഹാര പദ്ധതികളും ധനസഹായങ്ങളും സർക്കാർ പ്രഖ്യാപിക്കുന്നുണ്ടെങ്കിലും, അർഹരായ ആളുകളിലേക്ക് ഇത് കൃത്യമായി എത്തുന്നുണ്ടോ എന്ന് ഉറപ്പുവരുത്താൻ സംവിധാനങ്ങളില്ല. ബ്യൂറോക്രാറ്റിക് തടസങ്ങളും അഴിമതിയും കാരണം പല സഹായങ്ങളും യഥാർത്ഥ ഗുണഭോക്താക്കളിലെത്തുന്നില്ല. ആരോഗ്യപ്രശ്നങ്ങളുള്ള കുട്ടികളെ കണ്ടെത്തിയാലും, അവരെ തുടർച്ചയായി നിരീക്ഷിക്കാനും ചികിത്സ ഉറപ്പാക്കാനും ശക്തമായ ഒരു ട്രാക്കിംഗ് സിസ്റ്റം ഇല്ലാതെ പോകുന്നു. കേരളത്തിൽ ഇനി ഒരു കുഞ്ഞും വിശപ്പുകൊണ്ടോ പോഷകാഹാരക്കുറവ് കൊണ്ടോ മരണപ്പെടാൻ ഇടയാകരുത്. ഇതിനായി സമൂഹം ഒന്നടങ്കം ഉണർന്നു പ്രവർത്തിക്കണം.

 അടിയന്തരമായി വേണ്ടത്

 അങ്കണവാടി, ആശാ വർക്കർമാർ, വാർഡ് മെമ്പർമാർ എന്നിവരടങ്ങുന്ന സമിതികൾ ഗ്രാമങ്ങളിലെ എല്ലാ വീടുകളിലെയും കുട്ടികളുടെ ആരോഗ്യസ്ഥിതി കൃത്യമായി നിരീക്ഷിക്കണം.

 ദാരിദ്ര്യരേഖയ്ക്ക് താഴെയുള്ള കുടുംബങ്ങളിലെ കുട്ടികൾക്ക് ആവശ്യമായ പോഷകാഹാരം നേരിട്ട് വീടുകളിലെത്തിക്കാനുള്ള സംവിധാനം ഉണ്ടാക്കണം.

 സാമ്പത്തിക ബുദ്ധിമുട്ട് അനുഭവിക്കുന്ന കുടുംബങ്ങൾക്ക് സാമ്പത്തിക സഹായത്തോടൊപ്പം ആരോഗ്യ ബോധവത്കരണ ക്ലാസും നൽകണം.

കുട്ടികൾക്കെതിരെയുള്ള അവഗണന ശ്രദ്ധയിൽപ്പെട്ടാൽ ഉടൻ കർശന നടപടി സ്വീകരിക്കാനും കുട്ടിയെ ഏറ്റെടുക്കാനും വകുപ്പിന് കഴിയണം.

ഹരിപ്പാട്ടെ രണ്ടരവയസുകാരന്റെ മരണം കേരളത്തിന്റെ സാമൂഹിക പുരോഗതിയുടെ മുഖത്തേറ്റ കനത്തപ്രഹരമാണ്. വികസനത്തിന്റെ തിളക്കമുള്ള കണക്കുകൾ നിരത്തുമ്പോഴും, ഒരു കുഞ്ഞ് അന്നം കിട്ടാതെ അല്ലെങ്കിൽ പോഷകാഹാരക്കുറവ് മൂലം മരിക്കുന്നുവെങ്കിൽ അത് നമ്മുടെ സാമൂഹിക വ്യവസ്ഥയുടെ പരാജയമാണ്. ഈ മരണത്തിൽ നിന്ന് പാഠം ഉൾക്കൊണ്ട്, ഇനിയൊരു കുഞ്ഞും ഈ അവസ്ഥയിലേക്ക് പോകാതിരിക്കാൻ സർക്കാരും പൊതുസമൂഹവും ഒരുപോലെ ഉണർന്നു പ്രവർത്തിക്കണം. കുട്ടികളുടെ അവകാശങ്ങളും ജീവനും സംരക്ഷിക്കപ്പെടുന്നത് തന്നെയാണ് ഏതൊരു സമൂഹത്തിന്റെയും യഥാർത്ഥ പുരോഗതിയുടെ അളവുകോൽ.