വധശ്രമ കേസിൽ പ്രതി അറസ്റ്റിൽ

തിരൂരങ്ങാടി:വധശ്രമക്കേസിൽ പള്ളിപ്പടി സ്വദേശി അബൂ സ്വാലിഹ് കോയ തങ്ങളെ (38)​ പൊലീസ് അറസ്റ്റ് ചെയ്തു. വീടിന്റെ മുറ്റത്ത് വച്ച് നബിദിന ജാഥക്കിടെ മിഠായി വിതരണം നടത്തരുതെന്ന് പറഞ്ഞതിലെ വിരോധം വച്ച് മർദ്ദിച്ചെന്നാണ് കേസ്. ചെമ്മാട് പന്താരങ്ങാടി പള്ളിപ്പടിയിലായിരുന്നു സംഭവം. പള്ളിപ്പടി സ്വദേശി വലിയ പീടിയേക്കൽ ഹസൻകുട്ടിയെ (46)​ മർദ്ദിച്ചെന്നാണ് കേസ്. ഇടതുകവിളിൽ ചാവി കൊണ്ട് കുത്തിയും സ്റ്റീലിന്റെ വടികൊണ്ട് തലയ്ക്ക് അടിച്ചും പരിക്കേൽപ്പിച്ചെന്നാണ് പരാതി. ഇയാൾക്കെതിരെ ദേഹോപദ്രവം ഏൽപ്പിച്ചതിനും വഴിതടഞ്ഞതിനുമായി രണ്ടു കേസുകൾ നിലവിലുണ്ട്. തിരൂരങ്ങാടി സർക്കിൾ ഇൻസ്പെക്ടർ ബി,പ്രദീപ് കുമാറിന്റെ നേതൃത്വത്തിൽ എസ്.ഐ കെ.പി സഫ്വാൻ,​ എ.എസ്.ഐ മോഹനൻ,​ സി.പി. ഒ അനീഷ് ബാബു എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. പ്രതിയെ തിരൂർ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു.