കിഫ്ബി പുനരവലോകനം: ആദ്യയോഗം നടത്തി

തിരുവനന്തപുരം:ബഡ്ജറ്റിതര ധനകാര്യസ്ഥാപനമായ കിഫ്ബി വേണോ,വേണ്ടയോ എന്നാലോചിക്കാൻ രൂപീകരിച്ച, മുൻ ഐ.എ.എസ്.ഉദ്യോഗസ്ഥ സുധാപിള്ളയുടെ നേതൃത്വത്തിലുള്ള പുനരവലോകന സമിതി ആദ്യയോഗം ചേർന്നു. മഴക്കെടുതി ഉന്നതതല യോഗമുളളതിനാൽ മുഖ്യമന്ത്രിക്ക് പങ്കെടുക്കാനായില്ല. പ്രാരംഭ ചർച്ചകൾക്കുശേഷം യോഗം പിരിഞ്ഞു. ജൂലായ് 14ന് രൂപീകരിച്ച സമിതിയുടെ ആദ്യയോഗമായിരുന്നു. മൂന്ന് മാസമാണ് സമിതിയുടെ കാലാവധി.ഫെഡറൽ ബാങ്ക് മുൻ സി.എം.ഡി.ശ്യാം ശ്രീനിവാസൻ, ചാർട്ടേഡ് അക്കൗണ്ട്സ് അസോസിയേഷൻ മുൻ ചെയർമാൻ നിലേഷ് വികാംസെ, മുൻ സി.എ.ജി.എച്ച്. ശുഭലക്ഷ്മി നാരായണൻ, മുൻകേന്ദ്ര റവന്യുവകുപ്പ് സെക്രട്ടറി ഡോ.തരുൺ ബജാജ് എന്നിവരാണ് മറ്റ് അംഗങ്ങൾ. ധനകാര്യവകുപ്പ് അഡിഷണൽ ചീഫ് സെക്രട്ടറി,ഗതാഗത വകുപ്പ് സെക്രട്ടറി ടി.വി. അനുപമ, ധനകാര്യവകുപ്പിലെ ഒ.എസ്.ഡി.ആയ സച്ചിൻ കുമാർ യാദവ്, മുഖ്യമന്ത്രിയുടെ ഓഫീസിലെ എ.പി.എസ്. കെ.പി.കെ.തിലകൻ എന്നിവരും സമിതിയിലുണ്ട്.