റഷ്യ-യുക്രെയ്ൻ യുദ്ധത്തിൽ ഇന്ത്യയുടെ നിർണായക നീക്കം; ഇരുരാജ്യങ്ങളുമായി ചർച്ച നടത്തി എസ് ജയശങ്കർ

ന്യൂഡൽഹി: റഷ്യ-യുക്രെയ്ൻ യുദ്ധത്തിന്റെ പശ്ചാത്തലത്തിൽ സിവിലിയൻ കപ്പൽ ഗതാഗതത്തിന്റെ സുരക്ഷ ഉറപ്പാക്കുന്നതിനും കരിങ്കടൽ വഴിയുള്ള ധാന്യ കയറ്റുമതി പുനഃസ്ഥാപിക്കുന്നതിനും ഊർജ അടിസ്ഥാന സൗകര്യങ്ങൾക്കു നേരെയുള്ള ആക്രമണങ്ങൾ തടയുന്നതിനും റഷ്യ-യുക്രെയ്ൻ രാജ്യങ്ങളുമായും യൂറോപ്യൻ രാജ്യങ്ങളുമായും ചർച്ച നടത്തി ഇന്ത്യൻ വിദേശ കാര്യമന്ത്രി എസ്. ജയശങ്കർ. അറ്റലാന്റയിൽ നടന്ന ജി-20 വിദേശ കാര്യ മന്ത്രിമാരുടെ യോഗത്തോട് അനുബന്ധിച്ച് മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

യുദ്ധവുമായി ബന്ധപ്പെട്ട് മൂന്ന് പ്രധാന വിഷയങ്ങളിലാണ് ഇന്ത്യ ബന്ധപ്പെട്ട രാജ്യങ്ങളുമായി ചർച്ച നടത്തുന്നതെന്ന് വിദേശകാര്യമന്ത്രി പറഞ്ഞു. സിവിലിയൻ കപ്പലുകൾക്കും നാവികർക്കും നേരെ ആക്രമണം ഉണ്ടാകരുതെന്നാണ് ആദ്യത്തെ ആവശ്യം. വാണിജ്യ കപ്പലുകളുടെയും അവയിലെ ജീവനക്കാരുടെയും സുരക്ഷ ഉറപ്പാക്കേണ്ടത് അത്യാവശ്യമാണെന്നും അദ്ദേഹം ചൂണ്ടിക്കാട്ടി.

റഷ്യയിൽ നിന്നും യുക്രെയിനിൽ നിന്നുമുള്ള ധാന്യ കയറ്റുമതി പുനഃസ്ഥാപിക്കുകയാണ് രണ്ടാമത്തെ പ്രധാന ആവശ്യം. ആഗോള വിപണിയിൽ ധാന്യത്തിന്റെ മുഖ്യ വിതരണക്കാരായ ഇരു രാജ്യങ്ങളിൽ നിന്നുള്ള കയറ്റുമതി കരിങ്കടൽ മേഖലയിലെ സംഘർഷത്തെ തുടർന്ന് ഗണ്യമായി കുറഞ്ഞിട്ടുണ്ട്. ഇത് ആഗോള ഭക്ഷ്യവിപണിയെയും വിതരണ ശൃംഖലയെയും പ്രതികൂലമായി ബാധിക്കുന്ന സാഹചര്യത്തിൽ കയറ്റുമതി പുനരാരംഭിക്കാൻ മാർഗം കണ്ടെത്തേണ്ടതുണ്ടെന്നും ജയശങ്കർ പറഞ്ഞു.

ഊർജ അടിസ്ഥാന സൗകര്യങ്ങൾക്കു നേരെയുള്ള ആക്രമണങ്ങൾ തടയുന്നതാണ് മൂന്നാമത്തെ വിഷയം. എന്നാൽ ഇക്കാര്യത്തിൽ സമവായത്തിലെത്തുക ഏറെ സങ്കീർണമാണെന്ന് അദ്ദേഹം വിലയിരുത്തി. ഊർജ മേഖലയുമായി ബന്ധപ്പെട്ട കാര്യങ്ങളിൽ ഓരോ രാജ്യത്തിനും വ്യത്യസ്ത കാഴ്ചപ്പാടുകളാണുള്ളത്. എണ്ണ ശുദ്ധീകരണശാലകൾ, വൈദ്യുതി വിതരണ ശൃംഖലകൾ, ഇന്ധനം കൊണ്ടുപോകുന്ന കപ്പലുകൾ എന്നിവയെല്ലാം ഇതിന്റെ പരിധിയിൽ വരാമെന്നും വിദേശകാര്യമന്ത്രി വിശദീകരിച്ചു.

മൂന്ന് വിഷയങ്ങളിലും രാജ്യങ്ങളെ ഒരുമിച്ചിരുത്തി പൊതുധാരണയിലെത്തിക്കാനാണ് ഇന്ത്യയുടെ ശ്രമം. യുദ്ധത്തിൽ നേരിട്ട് ഇടപെടാതെ തന്നെ മാനുഷികവും സാമ്പത്തികവുമായ പ്രത്യാഘാതങ്ങൾ കുറയ്‌ക്കാനുള്ള നയതന്ത്ര ഇടപെടലാണ് ഇന്ത്യ ലക്ഷ്യമിടുന്നത്. കരിങ്കടൽ മേഖലയിലെ സംഘർഷം ആഗോള ഭക്ഷ്യ-ഊർജ വിതരണത്തെ ബാധിക്കുന്ന സാഹചര്യത്തിൽ കപ്പൽ ഗതാഗത സുരക്ഷയും ധാന്യ കയറ്റുമതിയും ഉറപ്പാക്കേണ്ടത് പ്രധാനമാണെന്ന് ഇന്ത്യ ചൂണ്ടിക്കാട്ടുന്നു.