സൂസി പുറത്ത്,​ പകരം മില്ലർ: വൈറ്റ് ഹൗസിൽ ട്രംപിന്റെ അഴിച്ചുപണി

വാഷിംഗ്ടൺ: മിഡ്ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടി കനത്ത തിരിച്ചടി നേരിട്ടതിന് പിന്നാലെ,​വൈറ്റ് ഹൗസിൽ അഴിച്ചുപണിയുമായി യു.എസ് പ്രസിഡന്റ് ഡൊണാൾഡ് ട്രംപ്. തിരഞ്ഞെടുപ്പ് തന്ത്രജ്ഞ സൂസി വൈൽസിനെ (69) വൈറ്റ്‌ ഹൗസ് ചീഫ് ഒഫ് സ്റ്റാഫ് പദവിയിൽ നിന്ന് നീക്കി.

പകരം തന്റെ വിശ്വസ്തനും കടുത്ത കുടിയേറ്റ വിരുദ്ധ നിലപാടുകാരനുമായ സ്റ്റീഫൻ മില്ലറെ (41)​ നിയമിച്ചു. നാളെ ചുമതലയേൽക്കും. ട്രംപിന്റെ ദീർഘകാല ഉപദേഷ്ടാക്കളിൽ ഒരാളായ മില്ലറാണ് സർക്കാരിന്റെ കുടിയേറ്റ നയങ്ങളുടെ പ്രധാന ശില്പി. നേരത്തെ വൈറ്റ് ഹൗസ് ഡെപ്യൂട്ടി ചീഫ് ഒഫ് സ്റ്റാഫ്,​ ഹോംലാൻഡ് സെക്യൂരിറ്റി ഉപദേഷ്ടാവ് തുടങ്ങിയ പദവികളിൽ മില്ലർ പ്രവർത്തിച്ചു.

പ്രസിഡന്റിന്റെ എക്സിക്യൂട്ടീവ് ഓഫീസിന്റെ മേധാവിയാണ് വൈറ്റ്‌ ഹൗസ് ചീഫ് ഒഫ് സ്റ്റാഫ്. ഈ പദവിയിലെത്തിയ ആദ്യ വനിതയാണ് സൂസി. സൂസിയെ ട്രംപിന്റെ രാഷ്ട്രീയ പ്രചാരണ വിഭാഗത്തിലേക്ക് മാറ്റിയേക്കും.

വോട്ടെണ്ണൽ

തുടരുന്നു

 ജനപ്രതിനിധി സഭയിലേക്കും സെനറ്റിലേക്കും വോട്ടെണ്ണൽ തുടരുന്നു. സഭയിലെ 19 സീറ്റുകളിലും സെനറ്റിലെ 2 സീറ്റുകളിലും ഫലംവരാനുണ്ട്

 ഡെമോക്രാറ്റിക് പാർട്ടി സഭയിൽ 254 സീറ്റും സെനറ്റിൽ 54 സീറ്റും നേടി. രണ്ടിടങ്ങളുടെയും നിയന്ത്രണം ഡെമോക്രാറ്റുകൾക്ക്

 റിപ്പബ്ലിക്കൻ പാർട്ടിക്ക് സഭയിൽ 162 സീറ്റ്. സെനറ്റിൽ 44