പോളി. വിദ്യാർത്ഥിക്കെതിരെ കേസ്:  മോർഫ് ചെയ്ത് വിറ്റ ചിത്രങ്ങളിൽ  അദ്ധ്യാപികമാരും പെൺകുട്ടികളും

കൊല്ലം: പുനലൂർ ഗവ. പോളിടെക്നിക്കിലെ അദ്ധ്യാപികമാരുടെയും വിദ്യാർത്ഥിനികളുടെയും വനിതാ ജീവനക്കാരുടെയും ചിത്രങ്ങൾ മോർഫ് ചെയ്ത് അശ്ലീല സൈറ്റുകൾക്കും ടെലിഗ്രാം ഗ്രൂപ്പുകൾക്കും വിറ്റു. അഞ്ചാം സെമസ്റ്റർ ഇലക്ട്രിക്കൽ എൻജിനിയറിംഗ് ഡിപ്ലോമ വിദ്യാർത്ഥി പുന്നല രോഹിണിയിൽ അച്യുതിനെതിരെ പുനലൂർ പൊലീസ് കേസെടുത്തു.കോളേജ് അധികൃതർ അച്യുതിന്റെ ഫോൺ പൊലീസിന് കൈമാറി.ഫോൺ ശാസ്ത്രീമായി പരിശോധിച്ച ശേഷം അച്യുതിനെ അറസ്റ്റ് ചെയ്യുമെന്ന് പൊലീസ് പറഞ്ഞു.

വിദ്യാർത്ഥിനി നൽകിയ പരാതിയിലാണ് കേസ് രജിസ്റ്റർ ചെയ്തത്.

ചിത്രം മോർഫ് ചെയ്ത് മോശം കാര്യത്തിനായി ഉപയോഗിക്കൽ, സ്ത്രീകൾക്ക് മാനഹാനി വരുത്തൽ എന്നിവയ്ക്ക് ബി.എൻ.എസിലെ 356, 79 വകുപ്പകളും, അശ്ലീല ചിത്രം ഇലക്ട്രോണിക് മാദ്ധ്യമം വഴി പ്രചരിപ്പിച്ചതിന് ഐ.ടി ആക്ടിലെ 67-ാം ആക്ട് പ്രകാരവുമാണ് കേസ്.

കഴിഞ്ഞ ചൊവ്വാഴ്ച കോളേജ് ഡേ ആഘോഷത്തിനിടെ ഉച്ചയ്ക്ക് അച്യുതിന്റെ ഫോൺ വാങ്ങി സഹപാഠി ഫോട്ടോകളെടുത്തിരുന്നു. ആ ഫോട്ടോകൾ നോക്കുമ്പോഴാണ് വിദ്യാർത്ഥിനികളുടെ മോർഫ് ചെയ്ത ചിത്രങ്ങൾ കണ്ടത്. സഹപാഠി മറ്റുള്ളവരോട് പറഞ്ഞതോടെ വിദ്യാർത്ഥിനികൾ പ്രിൻസിപ്പലിന് പരാതി നൽകി.

പ്രിൻസിപ്പിൽ അച്യുതിനെ വിളിച്ചുവരുത്തി ഫോൺ പരിശോധിച്ചപ്പോൾ പരാതി ബോദ്ധ്യമായി. രക്ഷിതാക്കളെ വിളിച്ചുവരുത്തി. അവർക്ക് മുന്നിൽ വച്ച് അച്യുത് കുറ്റം സമ്മതിച്ചു.

ചൊവ്വാഴ്ച തന്നെ കോളേജ് കൗൺസിൽ ചേർന്ന് അച്യുതിനെ സസ്പെൻഡ് ചെയ്തു. പൊലീസിൽ പരാതിയും നൽകി. മോർഫിംഗിൽ വിദഗ്ദ്ധനാണെങ്കിലും അച്യുത് പഠനത്തിൽ പിന്നിലാണ്. കോളേജിലെ എ.ബി.വി.പി യൂണിറ്റ് വൈസ് പ്രസിഡ‌ന്റാണ് അച്യുത്.

പണം കൈപ്പറ്റിയത്

ഗൂഗിൾപേയിൽ

മോർഫ് ചെയ്ത ചിത്രങ്ങൾ അശ്ലീല ടെലിഗ്രാം ഗ്രൂപ്പുകൾക്ക് നൽകി ഗൂഗിൾ പേ വഴി പണം കൈപ്പറ്റിയെന്ന് അച്യുത് സമ്മതിച്ചതായി കോളേജ് അധികൃതർ പറഞ്ഞു. അത്തരം ഗ്രൂപ്പുകളും അച്യുതിന്റെ ടെലിഗ്രാം അക്കൗണ്ടിൽ കണ്ടെത്തി. വിദ്യാർത്ഥിനികൾക്ക് പുറമേ നേരത്തെ ഗസ്റ്റ് അദ്ധ്യാപകരായി ജോലി ചെയ്തിരുന്നവരുടെ അടക്കം ചിത്രങ്ങൾ മോർഫ് ചെയ്തിരുന്നതായാണ് വിവരം.